E siguiente GM Challenge ta e fin di siman aki

ORANJESTAD - Tur cos ta cla pa e siguiente GM Challenge riba dia 5 di Juli segun Lourdes Gietel Geerman, Gerente Asistente Ehecutivo na Radisson Aruba Resort Casino & Spa. De hecho, recientemente e resort a duna e siguiente declaracion: como parti di un esfuerso continuo pa promove salud y bienestar den henter e resort y entre e empleadonan di e resort, Gerente General Mark Frances ta organisando un otro General Manager’s Challenge riba diasabra, dia 5 di Juli. E relay race ta cuminsa na e ruinanan di e mina di oro di Bushiribana. Tur coredor masculino lo core riba un ruta di 8KM, mientras cu coredornan femenino lo competi cu un distancia di 4KM. Pa haci e competencia mas igual, e coredornan mas avansa lo ta asigna pa diferente ekipo, asina tambe promoviendo atletismo y cooperacion entre e coleganan. Cu e meta di mehoracion continuo, miembronan di staff keto bai ta sigui mehora nan resultadonan di careda cu cada careda, mientras cu nan ta disfruta di un tiki competencia amabel. Henter e isla ta invita pa bin y sostene e coredornan, cuminsando pa 4:30pm.

E careda riba diasabra, 5 di Juli, ta inclui 32 participante masculino, coriendo den 16 ekipo, y 16 participante, coriendo den 8 ekipo. Yegando na Bushiribana/Ruina di Oro ta facil, ya cu e ta situa net pariba di e Parke di Avestruz, den e direccion di lama. 

E homber tras di e iniciativa, esta Gerente General di Radisson, Marc Frances, a scohe un formato interesante den cual cada participante masculino ta core 2K for di punto A pa B y ta bolbe bek 2K for di punto B pa A. Unabes cu e prome participante masculino for di cada ekipo ta yega bek, e ta wordo instrui pa mishi e man di su partner y despues su partner lo pasa den e mesun proceso di core for di punto A pa B, 2K, y despues bek for di punto B pa A, 2 K, haciendo esaki un sub total di 4K cori pa cada participante masculino, y  8K en total pa cada ekipo.

Coredornan femenino lo ta haciendo mescos, pero esun di nan lo ta un ruta di 1K for di punto  A pa B y 1K bek for di punto B pa A, haciendo esaki un sub total di 2K pa cada participante femenino y un total di 4K pa cada ekipo. E ekiponan masculino y femenino cu ta marca e temponan mas cortico lo gana e GM Challenge Relay Run. Coredornan participante ta preparando y ta bisa cu nan ta entusiasma y excita pa loke ta e evento benidero. Nan ta entrenando y ta den top forma pa e careda extraordinario. Hopi di nan a baha peso y ta den tremendo condicion, manera nunca antes! Cu coredornan mas lento y coredornan mas lihe trahando hunto, e careda por wordo gana pa cualkier ekipo, segun Lourdes Gietel Geerman, y cualkier grupo di participante por gana.

Radisson Aruba Resort Casino & Spa ta invitando miembronan di famia y amigonan pa bin y apoya e coleganan cu ta participando, esta e coredornan cu ta entrenando hopi y haciendo sacrificionan pa e evento special aki. Coi bebe y pasapalo lo wordo sirbi na final di e careda, na tur esnan presente.

Na e fanaticonan di futbol cu lo kier sigui e wega di Fifa Copa Mundial 2014 riba e dia aki, esta e wega entre Hulanda y Costa Rica, e wega lo wordo transmiti na e sitio di Bushiribana/ Mina di Oro, pa asina esnan presente por pasa mas bon ainda, y nan lo por wak e careda ademas di e wega di futbol, cuminsando pa 4pm.Mark Frances y e miembronan di e comision di GM Challenge, esta Margarita, Marina, Melissa, Mina, Marvinia y Lourdes, ta spera di por wak un gran cantidad di hende presente pa sostene e careda.