Desaroyado na Saliña Serca a haya 'ontruimingsbevel'

ORANJESTAD - Gobierno (lesa Directie Infrastructuur & Planning y Dienst Openbare Werken) a duna desaroyanan di un proyecto na Malmok/Saliña Cerca un 'ontruimings bevel', osea un orden di desalojo cu ta nifica cu nan mester kita e ceronan di santo deponi recientemente y cu a causa un conmocion den comunidad. E siman aki varios instancia a reclama e asunto aki unda cu 'un biaha mas' ta kibra naturalesa door di den e caso aki sin mas depone ceronan di santo blanco riba e Salinja Cerca sin cu ta permiti. Segun e miembro di management team di DIP Isabel Dammers, e desaroyadonan a surpasa nan area di construccion y a subi 'tereno prohibi'. 

TERENO EIGENDOM

Contrario na e area di Bubali cu ta uno duna na erfpacht, e tereno aki ta uno eigendom cu ta data for di 2005/6 segun Dammers. Desaroyadonan a cumpra e tereno aki pa desaroya esaki. E proyecto inicial a keda completa, pero a bin compronde cu e tereno tabatin un caminda publico asfalta parti pariba di e proyecto. A continua cu combersacionan 'ambtelijk' entre partidonan y a yega na un acuerdo pa por keda cla y regla tur cos manera mester ta. Aki a reuni cu e.o. e planoloog di DIP, DOW y otronan, unda cu a bin cu un 'voordracht'. A bay di acuerdo pa duna un pida tereno di huur como 'recompensa', como condicion pa e tennisbaan e tempo ey, y tambe un clubhuis cu lo a wordo traha riba tereno erfpacht. Ademas lo a instala un 'rioolwaterzuiver instalatie'. 

DEAL CU GOBIERNO

Despues di cu a surgi un periodo cu no a tende nada mas di gobierno, (for di 2009 no a tende nada mas di gobierno), e desaroyadornan a bay den un tipo di 'rapèl, unda cu eynan minister na 2013 a dicidi cu ta cera un combenio. Aki a dicidi cu ta duna tereno conforme e advies di DIP. 

VIOLA ESPACIO PERMITI

Sinembargo, a resulta awor cu e desaroyadonan a surpasa nan limite di tereno, violando e 1 meter ROP, y a deposita cantidad di cero di santo riba tereno cu no ta di nan, violando asina nan espacio cu nan tin derecho ariba. Como tal, Dammer a confirma cu a consecuencia di  e conocemento di e situacion 'nobo', mesora a haci opname y a bin deduci cu enberdad ta violando e acuerdo di espacio. Mesora a duna un 'ontruimingsbevel' pasobra a viola e espacio y a usa e 'bufferzone' stipula tambe pa deposita santo blanco unda cu no tabata por. "Aworaki nan mester ta bezig ta ontruim (e area)" Dammers a sigura NoticiaCla.com diahuebs ainda. Diaranson sinembargo, e situacion tabata mesun cos esta cu ainda e ceronan di santo tabata mesun caminda. Riba e fotonan di NoticiaCla.com por mira con e ceronan di santo ta riba e tereno cu no ta permiti y cu ta violando e espacio ey.

TERENO BERDE

Di otro banda, a aclarea cu mesun cos cu e caso di e tereno na Bubali Plas,  esun di Malmok/Saliña Cerca, tampoco no ta cay den un 'groen gebied', esta tereno berde. Como tal den e parti ey si, e desaroyadonan no ta violando e regla ey, manera cu ta wordo pretendi pa instancianan manera Aruba Birdlife Conservation Foundation.