Periodista Speed Andrade retira di trabou despues di conferencia di minister

ORANJESTAD - Un dia despues di e conferencia di prensa di minister Otmar Oduber, unda a confronta e periodista Nelson "Speed" Andrade cu su acusacionan cu lo ta 'sin base', e periodista en cuestion a wordo kita for di trabou na e matutino Diario. Ta trata e conferencia cu e mandatario di Turismo Otmar Oduber a yama pa desbarata acusacionan cu algun dia prome, Andrade a lansa na e.o. radio durante su noticiero. E mandatario a yama e conferencia diaranson pa eynan desbarata acusacionnan cu Andrade a lanta, cu ta entre otro cu Oduber ta mete den presupuesto di oficina di turismo di Aruba, y cu e ta doño di un emisora local. E retiro awe, a keda confirma pa fuentenan cerca di e periodista awe tardi. NoticiaCla.com a compronde pues cu e retiro tin di haber directamente cu e loke a sosode den e conferencia di prensa, unda cu entre otro e no a scucha orden di su hefe cu tabata na e conferencia di prensa. 

NO KIER A SIGUI ORDO

Durante e conferencia di prensa ora cu Andrade tabata haci pregunta na e mandatario, su hefe, -cu tambe tabata presente na e conferencia-, a bisele pa stop di haci e pregunta y of baha man na e tipo di preguntanan ey. Dado momento tabatin un discusion entre e mandatario y e periodista unda cu na final e mandatario a anuncia cu e lo hiba e periodista corte pa difamacion.  Enberdad NoticiaCla.com tabata presente y a mira e intercambio ey tambe entre e periodista y su hefe di trabou. Un di e consecuencia di e conferencia tambe lo tabata cu e mandatario lo a prohibi e periodista di bay su actividadnan, y consecuentemente tambe stop avisonan di su ministerio na e corant. Algo cu segun NoticiaCla.com a compronde, ta un problema pasobra e lo ta un entrada grandi pa e matutino. NoticiaCla.com a tuma contacto cu e mandatario pa confirma e ultimo parti pero no a logra. 

CASO DEN CORTE

NoticiaCla.com a compronde cu Andrade lo entama un caso contra e matutino mirando cu recientemente (algun luna pasa), el a cumpli 20 aña di trabou na e matutino y como tal e no tin pensa di laga esaki bay sin mas.