Compania offshore di Aruba den escandalo campaña presidencial Peruano

LIMA/ORANJESTAD - Un compania di offshore local lo por ta den centro di un escandalo presidencial Peruano, segun e corant Peruano La Republica a raporta. Segun e portal cybernetico Peruano, un schema di offshore na Aruba lo ta tras di un cantidad cuantioso di placa cu ta wordo uza pa financia e campaña presidencial di yiu muher di ex presidente Alberto Fujimori, esta Keiko Fujimori. E ta participando den eleccion presidencial Peruano pa 10 di april proximo. 

COMPANIA OFFSHORE

Segun e portal, un offshore di Aruba for di 1990 tabata operando di un forma pa genera fondo pa tata Fujimori, ora cu esaki a wordo crea pa e ex minister Jaime Yoshiyama. E compania registra na Aruba lo a absorba un cantidad di  compania maneha pa miembro di famia di e partido Forza Popular, di cual Keiko ta miembro. Keiko ta den un situacion fastioso unda cu tin cu dicidi e dianan aki si ta descualifica su candidatura mirando tur e loke cu e ta wordo acusa di dje.   

ARUBA PARAISO FISCAL

E corant a descubri un cantidad di fusion, compania scondi y paraiso fiscal bou di e compania di Yoshiyama, esta Pagapaxi. E escema a wordo localisa te na Aruba, unda cu ey a identifica Yoshiyama como un di e financiadornan principal di e partido Forza Popular. Y aki ta unda cu Aruba su nomber ta cay atrobe den un forma negativo, como un fuente financiero via e companianan offshore. 

OFFSHORE A FINANCIA CAMPAÑA DI ALBERTO FUJIMORI TAMBE

Loke a sali na cla cu no solamente awor, pero for di tempo di tempo di e campaña di e tata Alberto Fujimori, tabata uza e compania di Aruba pa financia e campaña presidencial. Problema ta cu ta cuestiona con tabata yega na e fondonan y no ta descarta cu tabata uza Aruba pa laba placa y consecuentemente uza e placa laba pa financia e  campaña di e tata. Awor ta uzando e mesun 'modus operandi' pa financia e campaña presidencial di e yiu muher Keiko. 

PRESIDENCIA FUJIMORI

Alberto Fujimori tabata presidente di Peru di 1990 te 2000. Despues el a huy pa Japon, pero a wordo deteni na 2005 durante un bishita na Chile. Na 2007 el a keda sentencia pa corupcion y despues a haya varios sentencia mas den su contra, entre nan uno di 25 aña di prizon pa a viola derecho humano y acusa di a mata centenares di gruponan opuesto.