ABC ta alerta notarionan pa desaroyo di dos tereno

ORANJESTAD - Den un intento pa alerta tur notario na Aruba, Aruba Birdlife Conservation (ABC) a manda un carta ayera cu e preocupacion cu dos area proteha, ta den proceso pa wordo usa como tereno pa construccion di un of otro proyecto. E carta ta dirigi na tur notario riba e isla, pa nan tene esaki na consideracion si nan mester atende cu un di e dos terenonan menciona. Ta haci mencion di e leynan y mocion cu tin pasa den pasado, y cu e si otorga y procesa e terenonan aki, e por tin consecuencia serio. Ta trata di un tereno recientemente rosa na Bubali Plas, y parti di e boca di Saliña Cerca unda cu recientemente a deposita yen di sero di santo, cu ta mustra un preparacion pa un of otro construccion tambe. 

ALERTA 

ABC ta alerta e notarionan local di e.o. un ley di 2006 unda cu a determina ordenanza teritorial, y tambe e Ruimtelijke Ordenings Plan (ROP) cu ta data di 2009 pa 2019. Y finalmente e hecho cu parlamento na 2013 den forma unanime a stipula 16 area berde como areanan protegi. Y netamente e dos terenonan menciona, ta forma parti di esaki. Tambe ta recorda e notarionan cu ta prohibi pa destina tereno domein na tercera parti. 

KICO PROYECTONAN TA

A compronde di presidente di ABC, Greg Peterson cu intentonan ayera pa haya sa mas di e proyectonan, tabata envano durante nan bishita na DOW. NoticiaCla.com a compronde inoficialmente cu un di e terenonan rosa, ta pa un proyecto hotelero otorga algun tempo pasa. Algo cu ni minister di turismo Otmar Oduber tabata na altura di dje. Asina e mandatario mes a confirma na e portal aki diaranson mainta. NoticiaCla.com ta continua cu su investigacion riba e tema aki. Lesa e carta aki.