Minister a anuncia cu ta hiba periodista corte pa difamacion

ORANJESTAD - Minister Otmar Oduber ta bay hiba e periodista Nelson "Speed" Andrade corte pa difamacion. Loke mester a bira un conferencia di prensa diaranson pa refuta acusacionan contra e mandatario dialuna ultimo, a desemboca den un discusion entre Andrade y Oduber, unda cu na final, ora cu Andrade a keda insisti riba alegacion contra Oduber, e ultimo a bis'e cu e ta bay demand'e pa difamacion. Ora cu NoticiaCla.com a puntra Oduber kico e motibo specifico ta, Oduber a referi na e acusacion cu Oduber lo ta doño di e emisora Power FM di Piedra Plat. "Mi ta reta bo saca esey" Oduber a bisa Andrade, refiriendo na e declaracion cu Oduber lo ta doño di Power FM. "Y si no mi ta hibabo corte, si bo no hala bo palabranan aden" Oduber a bisa. Ora cu Andrade a nenga di haci tal, Oduber a anuncia cu 'mayan e ta hiba Speed Andrade corte "Miembronan di prensa, bij deze mi ta hiba Speed Andrade corte pa difamacion pa loke ela trece dilanti" Oduber a declara e ora na e periodistanan presente. 

DEBER PA INFORMA CORECTAMENTE 

Prome cu esey, Oduber a lamenta 'cu riba un isla asina chikito, unda nos mester unifica comunidad, un reportero cu su deber ta pa informa comunidad debidamente, ta haci mal uzo di su profesion pa instiga y dividi nos pueblo. Locual ta mas serio ainda ta, cu e ta mishi cu credibilidad y reputacion di profesionalnan Arubianonan kendenan ta trahando duro den un institucion cu ta e base principal di Aruba su economia', Oduber a bisa. Segun e mandatario, Aruba Tourism Authority (ATA) ta traha conforme ley y ta e unico entidad cu ta entrega su relato anual manera mester ta y sigur merece hopi mas respet. E mandatario a mustra cu e ta un politico y ta kere cu no mester hunga wega politico cu institucionnan asina importante di nos pais. Oduber a splica cu e ta kere cu e trabou di periodismo ta uno importante y bunita pa haci mirando cu su persona mes den pasado a fungi como vocero di gobierno di Aruba, pero loke ta importante tambe pa esnan cu ta fungi e trabou aki pa verifica riba loke kier informa comunidad. Como tal e ta lamenta cu durante su bishita di trabou na Hulanda aki na Aruba a lanta un polemica innecesario. E mandatario ta lamenta riba e insinuacionnan robes cu a keda duna na pueblo unda cu ta atacha nomber di ATA y Minister.

ACUSACION CONTRA ODUBER

E mandatario despues a mustra NoticiaCla.com cu mientras cu Andrade a bin cu yen di acusacion contra dje, e no tabatin prueba di nada y como tal tin cu cu bay demonstra tur esaki den un caso den corte. A splica Andrade durante e conferencia, con cos ta hinca den otro unda cu dificilmente un minister por 'haci y deshaci' den e loke Andrade a yama 'ATA BANK', ya cu e reglanan ta poni di tal forma cu e mandatario no por haci e loke cu e ta wordo 'acusa di dje'.  A referi Andrade constantemente na tur e organonan di control manera CAD y otro instancia, y unda cu a referi na tur sorto di cifranan anual cu lo tin cu demonstra cu e loke cu Andrade ta insinua, no ta cuadra. 

COMERCIANTE RALPH MADURO

Andrade a bay riba e hecho cu varios compania riba nomber di comerciante Ralph Maduro ta liga na e mandatario, y cu e lo ta wordo previligia pa e mandatario. Aki e mandatario a mustra Andrade cu e insinuacionan ey e no ta acepta, y cu e loke cu a sosode cu Maduro, tur ta casonan cu a wordo gana pa e comerciante den destahonan publico y cu no tin nada ilegal y of malo cu a sosode. E mandatario a finalisa e punto bisando cu 'esun cu cuestion'e of lanta huma caminda cu no tin, ta confront'e'. Aki por mira un video cu ta circula riba youtube.com di e intercambio di palabra entre e mandatario y e periodista.