A detene homber pa maltrato y morto di su tanta

ORANJESTAD - Polis a detene un homber relaciona cu un caso mas tempran di un dama cu a fayece, posiblemente a consecuencia di maltrato fisico. Segun vocero suplente di polis Liliana Rasmijn, subrino di e señora (mas tempran a detene e homber caba pa buracheria) a wordo deteni relaciona cu e caso. Fiscal a duna ordo na recherche di Noord pa detene e persona 'buitenheterdaad' mirando e investigacion cu ta andando.

Tabata awe mainta marduga cu melding a drenta via 911 prome cu un señora lo a bira malo na cas. E ora e departamento di 911 a tuma contacto cu central di polis. "Nan a manda patruya na e cas e ora". Ambulance tambe a yega na unda a trata e señora y bay cu ne hospital. "Lamentablemente e señora (B.B) naci na 1942 y biba na Moko, a fayece. Segun informacion suministra, doctor a constata hopi sla na cara y cabes di e señora. E fiscal a laga tuma e curpa den beslag.