ATA: Patrocinio ArubaDag na Hulanda a costa 2.500 euro

ORANJESTAD - A.T.A. su contribucion pa loke ta e celebracionnan local rond di nos Himno y Bandera ta di AWG 25,000.-. Asina e CEO di e oficina di turismo di Aruba, Ronella Tjin-Asjoe a reacciona den un comunicado pa contra aresta acusacionan e siman aki, riba posibel 'malgastamento di placa' pa e evento cultural recien. Uzando palabranan manera ATA BANK, indicando cu ATA ta manera un banco cu ta patrocina eventonan manera nada, e CEO mester a bin dilanti pa defende e oficina y mustra e transparencia segun Tjin Asjoe a sigui splica. 

APORTE FINANCIERO

Segun e CEO, a base anual A.T.A. a bin ta duna su aporte na e celebracion oficial di nos Himno y Bandera riba nos isla, door di ta un di e sponsornan." Esaki A.T.A. ta haya ta importante den e afan di sostene nos cultura, como tambe den e afan di trece momentonan importante asina mas cerca di nos turistanan cu na e momento ey ta di bishita riba nos isla", e CEO a sigui bisa.   Pa loke ta trata ‘Aruba Dag’, Tjin Asjoe ta admiti di a ricibi un peticion di Gabinete di Minister Plenipotenciario na Hulanda, pa evalua si por asisti cu mas y esaki A.T.A. ta evalua, pero no a duna ningun compromiso, haciendo e total di e contribucion pues: € 2,500.--.

SPONSORSHIP

Ademas, riba e asunto di sponsorship, e CEO ta sigura cu manera ta e caso cu cada ‘sponsorship’ incluyendo ora ta trata e diferente eventonan cu A.T.A. ta sponsor, ta yega na acuerdo cu e organisacionnan concerni kende mester cumpli cu un cu e otro."  Mas grandi e sponsorship, mas rigoroso e contratonan y exigencianan, pa cual porcierto hopi biaha e organisacion ta pasa den un auditoria haci door di un accountant independiente (entre otro Deloitte), kende ta midi e cumplimento cu tur e rekisitonan, incluso maneho financiero di e fondonan".