Ta fumiga e siman aki den districto di Paradera y Santa Cruz

ORANJESTAD - Tin un solo forma pa preveni e enfermedadnan di Dengue, Chikungunya y Zika, cu ta dor di elimina e sanguranan Aedes Aegypti. Mester ta cla pa tur hende cu sin criadero no tin sangura y sin sangura no tin ningun di e tres enfermedadnan ariba menciona.

FECHA EXACTO

Ta den cuadro di e medidanan di prevencion cu Gele Koorts en Muskieten Bestrijding ta aplicando, lo fumiga riba diaranson awor 23 di maart den e districto di Paradera, pero tambe lo fumiga den e areanan di Hooiberg, Casibari, Ayo y Piedra Plat. Diahuebs dia 24 di maart e accion lo continua den e districto di Santa Cruz, pero enfocando specialmente den e areanan di Papilon, Macuarima, Sabana Grandi y Simeon Antonio. Departamento di Salud Publico Aruba ta informa comunidad cu e orario cu GKMB lo fumiga ta entre 5:00 pm pa 7:00 pm. Pa e fumigacion por ta efectivo, ta conseha habitantenan den e barionan aki pa habri bentana y porta durante cu e pickup ta fumigando den e area. Tene bista riba bo mascotanan y parhanan, cambia awa di e mascotanan pa awa limpi despues di fumigacion. Keda paden si bo ta un persona cu un condicion di salud delicado y habri porta ni bentana pa no perhudica bo salud.