Renaissance Marketplace a ricibi local y turistanan pa celebra hunto nos Dia Nacional

ORANJESTAD – Renaissance Marketplace ta wak atras contento y cu orguyo na un Dia Nacional den cual e centro comercial a celebra hunto cu nos pueblo y bishitantenan. E actividad a entretene grandi y chikito. E smaak, zonido y balornan di nos identidad a keda resalta den un dia yena di alegria. Hopi ta esnan cu a atende e invitacion di Renaissance Marketplace pa conmemora e 30 aña di nos Status Aparte y 40 aña di nos Himno y Bandera. Tabata special pa mira con nos hendenan local y turistanan a mescla den uno pa goza y honra nos pais.

ATRACCION

Entre e atraccionnan prepara specialmente pa e dia aki, tabatin presentacion di baile di grupo Rosea Cultural, canto di Amy  Sorinio y musica di bandanan local masha gusta manera Youth Extreme y Robert y Su Solo Banda Show. Museo di Arte y Creatividad pa Mucha Aruba, MUMA a hala hopi atencion tambe cu su espacio den e centro comercial y aki percura pa e muchanan tabata activo expresando nan amor pa Aruba pa medio di pintura. Loke tambe tabata masha gusta diabierna ultimo na Renaissance Marketplace tabata e photo booth cu a prepara specialmente pa nos dia nacional. Cu e colornan di nos bandera y algun bushi y cadushi, e tabata djis iresistibel y tanto turista como local a saca hopi potret cu ne. E restaurantnan a keda yen henter dia y anochi caminda publico a probecha di e platonan delicioso y ofertanan atractivo cu tabatin specialmente riba e dia aki. E variacion amplio di opcionnan cu tin na Renaissance Marketplace ta haci'e e lugar perfecto paso tur hende por satisface su smaak personal.

PENDIENTE DI FACEBOOK

Pero e diversion no ta caba aki; Renaissance Marketplace ta invita un y tur pa keda pendiente via di su pagina di Facebook. Constantemente e centro comercial tin promocion y eventonan interesante. E proximo gran actividad habri pa henter comunidad lo ta e celebracion di Dia di Rey na fin di april.