No por multa si sticker no ta pega riba windshield

ORANJESTAD - Pa motibo di un 'buraco den ley', e ta haci dificil pa polis duna multa na automobilistanan cu no tin e sticker di number di auto pega riba windshield. "No por duna boet pa e sticker, paso e no ta den nos wetgeving geregeld" hoofdagent Alex Pieters encarga cu trafico ta confirma na NoticiaCla.com. Esey sinembargo no ta stroba polis di para e automobilista pa haci su control. " E ta duna nos como polis un indicacion pa para e auto paso posibelmente e persona lo no tin belasting paga" Pieters ta sigui bisa. Vocero di departamento di impuesto Meverly Romano mientrastanto ta confirma cu hopi hende cu posiblemente a paga, no ta pegando e sticker riba nan windshield. "Hopi ta core cu ne den nan 'dashboard', Romano a confirma. 

BURACO DEN LEY

P'esey actualmente, mientras cu tur hende mester tin por lo menos 2 cuartal paga, tin auto ta core rond sin e sticker pega riba windshield, cu tin cu indica cu a paga pa impuesto di number di auto. Un cambio cu añanan anterior ya cu no a keda cla cu plachi di number pa motibonan di cambio di maneho. E intencion tabata pa cambia e sistema pa cobransa den accijns, pero esaki no a sigui. A opta e ora pa implementa e parti di sticker pa toch tin un tipo di control. 

POLIS LO SIGUI PARA AUTO SI

Cu e implementacion nobo sinembargo, no a inclui un articulo den ley cu ta obliga e automobilista pa pega e sticker. " Tin artikel pa belasting y tin artikel apart pa kentekenplaat. Pa sticker no tin" Pieters ta sigui bisa. "Dus si bo a paga pero no pega kenteken, e ora ey si tin artikel apart pa duna boet". Pero atrobe, Pieters ta mustra si cu esey no ta stop polis di para e auto. " Si toevallig bo falta algo otro lo bo haya boet pa e otro cosnan . Dus bo a paga pero no pega sticker, bo ta coriendo sin bo rijbewijs y polis para bo paso no tin sticker, e papel di pago si ta bon pero bo no tin rijbewijs cu bo" Pieters ta sigui bisa. " Dus mihor pega e sticker pa evita pa wordo para mas liher" e ta finalisa bisando.