Awe ta dia internacional di awa

ORANJESTAD – Diamars dia 22 di maart, ta Dia Mundial di Awa. Esaki ta e di 24 biaha cu United Nations ta celebra dia mundial di awa. E ta un forma pa conscientisa comunidad di e importancia di awa den tur aspecto mundial. E aña aki e tema mundial ta ‘Awa y Empleo.’

1 BIYON+ TA TRAHA DEN SECTOR DI AWA

Awendia casi mitar di tur empleado na mundo - 1.5 biyon di hende – ta traha den sectornan relata na awa. Casi tur empleo ta depende di awa y di esnan cu ta sigura su suministro confiabel. Toch t’asina cu miyonnan di hende cu ta traha den sectornan di awa, hopi biaha no ta reconoci of proteha pa derechonan basico di labor. E tema pa 2016 – awa y empleo – ta enfoca riba con suficiente cantidad y calidad di awa por cambia bida y porvenir – y hasta transforma sociedad y economianan. 

ARUBA NO CONOCE SCARSEDAD DI AWA

Na Aruba nos no conoce scarcedad di awa. Nos compania di awa y energia, WEB Aruba ta percura pa un calidad halto di awa 24 ora pa dia. ‘Tambe nos ta contento di por ofrece nos empleadonan un di e mihor paketenan di condicionnan di trabou, pa asina balora e importancia di nan trabou pa provee awa na nos comunidad y pa nos economia.’, Luis Oduber, director general di WEB Aruba ta informa. 

GRADICI 

P’esey Gerencia di WEB Aruba kier haci uzo di e oportunidad pa gradici pueblo di Aruba pa e sosten y e oportunidad pa ofrece awa di calidad tur dia di nobo. Tambe Gerencia di WEB ta gradici tur su empleadonan pa e dedicacion y esfuerso continuo pa ofrece nos comunidad  awa di calidad halto.