Detencion tata cu a maltrata su baby, prolonga cu 8 dia

ORANJESTAD - E detencion di e tata cu ta wordo acusa di a maltrata su propio yiu di 7 siman, a wordo prolonga cu 8 dia. Vocero di Ministerio Publico Ann Angela a confirma pa NoticiaCla.com dialuna cu diasabra ultimo, e acusado a presenta dilanti Hues Comisario, cu a prolonga su detencion. E acusacion segun Angela, ta 'maltrato pisa'. 

DETENCION

Diasabra NoticiaCla.com eroneamente a publica informacion cu e tata a keda deteni diasabra ultimo, siendo cu a resulta cu ta for di diaranson siman pasa esaki a sosode. E informacion publica inicialmente a wordo suministra pa polis na NoticiaCla.com, locual a resulta di ta incorecto, ya cu en realidad e detencion tabata mas prome. 

RABIA DEN COMUNIDAD

Mientrastanto e rabia den comunidad pa cu e caso aki ta creciendo rato pa rato. Riba Facebook y na radio, comentarionan ta hopi riba e loke cu e tata a haci. Tin un rabia basta grandi unda cu hendenan ta vocifera nan desaprobacion total pa e acto. Algun a bay asina leu di mustra cu nan mes lo 'tuma ley den man' si nan haya e persona aki riba caya. Otronan a 'simplemente' keda na 'desea tur malo' pa e persona en cuestion. Segun Angela, e caso ta keda bou di investigacion. Ademas, Angela ta aclarea cu contrario na informacionan suministra den cierto medionan awe, no ta e di dos caso di maltrato e tata aki ta envolvi den dje.