Desmantela refineria, y lo tin problema mas grandi cu ora a pasa ley di CAFT

ORANJESTAD - 'Tribi di desmantela e refineria y lo boso haya un problema hopi mas grandi cu e dia cu e gobierno di AVP y Parlamento di AVP  a pasa e ley di traicion di CAFT'. Esey tabata e mensahe di parlamentario Glenbert Croes den direccion di gobierno di Aruba dialuna mainta. Segun Croes, falta 10 dia exacto pa por logra e acuerdonan final pa logra e reapertura di e Refineria di Aruba cu PDVSA CITGO. " MEP kier manda un advertencia pa gobierno di AVP: Stop di hunga wega y sigui alarga e negociacionan innecesariamente mientras cu nos por tin un acuerdo definitivo caba cu CITGO pa asina sigura e reapertura di e refineria".

NO KIER HABRI REFINERIA BEK

Segun Croes, e ta bisa esey principalmente ' pasobra nos a ricibi informacion cu tin forsanan ainda den Gobierno di AVP y den e Comision negociador cu no kier pa e refineria habri bek'. Segun Croes, taambe nan a tuma nota di e declaracion di un di ministernan di e Gobierno aki cu a laga sa cu si pa 1 di mei no tin acuerdo cu CITGO cu gabinete Mike Eman lo desmantela e refineria.

DEADLINE

Manera ta conoci, gobierno a pone un ultimatum pa 31 di maart firma un definite agreement cu CITGO pa cu reapertura di e refineria. Esey ta aki 10 dia. Si pa e fecha ey no tin firma, no ta conoci si esey ta nifica cu no tin deal mas, of si mester di mas dia pa por keda cla cu esaki. For di masha dia no a tende nada mas concreto, fuera cu minister encarga Mike de Meza a biaha pa Houston dos siman pasa pa reuni atrobe y a mustra e tempo ey cu cos tabata bayendo basta bon pero nada concreto. Ta spera cu mas tarda fin di siman aki of comienso di otro siman, por tin un contesta final riba e tema aki.