Abogado ta desmenti confesion nobo di Joran vd Sloot na Peru

LIMA - No ta berdad cu Joran ta admitiendo culpabilidad di morto di Natalee Holloway. Abogado di van der Sloot, Maximo Altez a splica prensa Mericano cu e ta contradeci e video cu a keda publica recientemente, y cu a causa un ola di reaccion atrobe riba e caso." e ta un mentira, e ta un video fabrica cu a wordo edita pa parece diferente" Altez a sigui bisa. E video ta parti di un grabacion cu e periodista Hulandes John vd Heuvel a haci cu vd Sloot luna pasa den prizon na Peru. 

E CONTENIDO DI E VIDEO

E video ta filma 'incognito' durante bishita di casa di vd Sloot, unda cu gran parti ta papia di e incompetencia di e forma con polis a atende cu e caso Holloway. "Esaki tabata un di e pio investigacionan policial cu a yega di tuma lugar" vd Sloot ta bisa riba e grabacion. E website 'RADARONLINE' ta esun cu a re produci e video cu subtitulo na ingles. Durante e 'combersacion' vd Sloot ta admiti di lo tabata responsabel pa e desaparicion di Natalee Holloway. E abogado ta admiti cu vd Sloot ta un mentiroso patologico, y cu su confesion no tin base pasobra el a sosode pafo di un corte di husticia. 

CASA TA DESMENTI 

E casa di vd Sloot cu ta admiti cu a tene e entrevista, no ta contento cu a graba esaki. "No tin sentido pa Joran declara algo asina" e casa Figueroa a bisa. El a admiti di a coordina e entrevista, cu a tuma lugar na januari y a dura dos ora. Pero no tabata planea pa e wordo graba cu camara.