Sospechoso principal di atraco arma di Ritz deteni

ORANJESTAD - Polis a detene sospechoso principal di atraco arma di Ritz diasabra mainta. Tabata na luna di januari ultimo cu a tuma luga un atraco arma riba Ritz Ice Cream na Savaneta. Mesora e departamento encarga cu investigacionnan di casonan di atraco a inicia cu un investigacion, cu ayudo di e declaracionnan na e sitio, tipnan valioso, declaracion di testigonan, material visual di camaranan di siguridad y asina por sigui menciona. 

DETENCION

Diasabra mainta recherchenan di Atraco Team a logra yega asina leu cu e investigacion, cu a bay over na detencion di e sospechoso di inicial R.E. naci na aña 1970, pues di 45 aña di edad. A detene na su cas situa den Caya Butishi, antes Mabon Kavel. E sospechoso ta un conoci caba di husticia. 

E ATRACO

E atraco mes a tuma luga diadomingo dia 10 di januari 2016 alrededor di 11:00 pm na Ritz Ice Cream situa na Savaneta. Un homber cu capuchon shinishi riba cabes, sweater manga largo a drenta e establecimento via porta di cushina y exigi placa di e benta di dia. Despues el a sali na careda y perde den scuridad di anochi den e mondi patras. El a hiba dos tas color beige di e trahadonan y e saco di placa di e negoshi. E ladron a laga e dos tasnan benta atras riba veld di Undesa pero e placa di benta si a somenta.

MAS DETENCION NA CAMINDA

Di acuerdo cu e ekipo di recherchenan di “Atraco Team”, no por descarta ainda cu mas detencion lo por sigui awor, pero nan ta convenci cu e sospechoso deteni aki ta e persona principal den e atraco. Awor lo sigui cu mas investigacion y scucha e version di e sospechoso, confront’e cu pruebanan riba mesa y prepara e caso pa Fiscal hiba Corte.