Renaissance Marketplace ta invita bo pa marca aniversario di nos Himno & Bandera y tambe di nos Status Aparte

ORANJESTAD – E aña aki Aruba ta bay conoce un celebracion di su dia nacional tur cu tin y Renaissance Marketplace simplemente no por keda atras. Renaissance Marketplace preparando pa un un celebracion grandi.  No ta tur dia ta celebra 30 aña di Status Aparte y 40 aña di nos himno y bandera. E diabierna 18 di maart 2016, lo tin hopi gozo y amor pa nos isla cu musica, cuminda, bebida y entretenimento pa grandi y chikito.

Tur cos ta cuminsa for di 7’or di anochi caminda cada restaurant of café na Renaissance Marketplace lo tin un menu special pa nos dia nacional. Lo tin diferente promocion y oferta caminda ta resalta nos custumber y tradicionnan. Plato y bebidanan tipico lo ta obtenibel ademas di pasaboca y decoracion den nos colornan patrio. Renaissance Marketplace ta bira e luga ideal pa relaha cu famia of amigonan despues di un dia di celebracionnan rond di nos isla.

Y mientras bo ta deleita tur bo sintinan cu e miho smaaknan cu tin den nos cultura, no ta bay tin falta di bon musica pa goza y baila ya cu nada menos cu Robert y Su Solo Banda Show lo t'ey pa anima musicalmente. Tambe ta bay toca e anochi aki e muchanan di Youth Extreme y Amy Sorinio, creando un combinacion estupendo pa satisface tur smaak musical. Cada stage lo ta na otro punto di Renaissance Marketplace pa asina por pasa di un pa e otro y disfruta tur.

Adicionalmente tin presentacion di baile tipico di parti di e grupo Rosea Cultural. Nan lo presenta algun di e dansanan mas tradicional di nos isla pa asina mantene nos folklore na halto. Hunto cu tur esaki, lo tin mesa ofreciendo articulonan artesanal ademas di un photo booth special pa nos Dia Nacional caminda por saca potret di recuerdo completamente gratis.

Muchanan no ta keda atras y pa nan tambe Renaissance Marketplace tin varios sorpresa prepara pa asina nan forma parti di e celebracion y ta keda entreteni. Keda pendiente di esaki y tur informacion nobo cu bin pa e gran celebracion di 18 di maart dor di sigui e pagina di Renaissance Marketplace riba Facebook. Ban celebra nos Himno y Bandera y tambe nos Status Aparte den grandi… Biba Aruba!