Refunjol: ‘Loke mi por a sinti awe nochi, ta loke ta haci nos grandi como pais’

ORANJESTAD - No tin duda cu nos Gobernador di Aruba Fredis Refunjol a keda mas cu satisfecho cu e producto final di e grabacion di nos himno Aruba Dushi Tera, toca pa un orkesta simfonico di New York y 40 cantante local. “Mi ta sinti mi sumamente honra” Gobernador Refunjol a bisa durante su discurso diaranson anochi na Fort Zoutman. “Ora cu Jonathan (Vieira) tabata papia, e ta yena bo cu emocion” Refunjol a sigui bisa. E produccion presenta diaranson anochi tabata un regalo di despedida p'e, na ocasion di e final di su termino como Gobernador na mei proximo. 

FANATICO DI MUSICONAN

Conoci pa su anectoda chistoso, Refunjol a sigura tur presente cu e ta conciente cu e no ta un musico. “Pero mi ta bisa semper, tin hende cu mester toca pa e otronan balia. Considera mi den e otro grupo. E di dos grupo” Refunjol a sigui bisa. Cu e ta fanatico di e musiconan presente tambe e no a sconde. Loke e no a sconde tampoco ta cu su gustonan no ta wordo semper comparti den su famia. 

ARUBA TA GRANDI COMO PAIS

“Loke mi por a sinti awe nochi, ta loke ta haci nos grandi como pais” Refunjol a sigui bisa. Hopi biaha e ta haya e pregunta serca coleganan, di con un pais chikito manera nos ta, por haci asina hopi. “E spiritu cu mi a sinti awa, esey ta haci nos grandi como pais. Como Rubiano. Cu nos por ta orguyoso” e representante di Reino na Aruba a bisa. 

NOS SPIRITU POR LOGRA TUR COS

Recordando su temponan di deporte di pasado, y ora cu e tabata sinti e tononan glorioso di nos himno, e tabata sinti esaki tur ora. “Cada bes e himno tabata zona, kere mi cu bo cabeynan ta lanta para. E ta yenabo cu emocion. Segun Refunjol no ta pornada cu ta celebra 30 aña status aparte y 40 aña di himno y bandera. “E forsa, e union di nos tur, di pueblo, ta haci nos grandi. Y esey ta e spiritu cu nos mester tin pa enfrenta tur challenges, pasobra nos por. Y nos lo atende cu nan y lo percura cu tur cos keda manera e mester ta” Refunjol a sigui bisa. El a gradici Vieira un bes mas pa e honor y na nomber di Aruba. 

HOBENAN MESTER TUMA E BATUTA OVER

Loke tabata importante pa Gobernador, tabata e hecho cu asina hopi hoben a comparti e escenario cu ne diaranson anochi. “E ta masha masha importante cu nos por transmiti esaki pa e hobennan. E hobenan mester tuma e batuta over y sigui cu e Arubianismo cu a keda desplega diaranson anochi na Fort Zoutman. Nos mester kere den nos hobennan. Esey ta haci nos fuerte como pais” e hefe di Reino na Aruba a bisa finalmente.