KvK: Gobierno awor mester duna ehempel di reducion di gasto y opera mas eficiente

ORANJESTAD - Despues di a lesa e rapport di CAFT y tambe e articulo di ayera, presidente di Camara di Comercio (KvK) Daphne Agius Cesareo-Lejuez a comparti algun observacion y preocupacion pa cu esakinan na NoticiaCla.com. Segun Cesareo-Lejuez, ta di acuerdo cu e logro di reduccion di deficit na 2% no ta debi na cambionan structural, pero mas bien por wordo contribui na accion nan manera VAS fin di anja y adicionalmente "kwijtschelding" di debe di 60 miyon na SVb.  

FALTA ESFUERSO MAS RIGOROSO

“Ta lamenta cu no a haci un esfuerso mas riguroso y structural pa reduci gastonan di aparato gubernamental, pero solamente a concentra pa subi entrada door di aumenta e contribucion di sector priva y consumidor door di introduci VAS y un aumento di BAZV pa 2015” Cesareo ta sigui bisa. Ta cuestiona e ora con lo kier logra un reduccion di deficit similar pa 2016 y e proximo añanan nos dilanti? E re-apertura di refineria lo tin e efecto desea si ta papia di por lo menos 2 aña prome cu esaki lo por opera debidamente? Y den caso cu e re-apertura di refineria no tuma lugar, lo introduci mas medida? Dus asina keda aumenta e costo di bida y di haci negoshi na Aruba?, e presidente ta sigui bisa. 

CRECEMENTO MODERA 

Den su comentario como presidente di KvK, Cesareo ta mustra cu enberdad e economia a wak un crecemento hopi modera (2%) na 2015 y tin hasta menos pronostica pa 2016 (1.8%) y no manera ta wordo presenta pa gobierno (3.8%). “ Esaki por wordo confirma door di cifras di Banco Central mes, unda ta mustra un reduccion den importacion como tambe den compra di consumidor”. Fuera di esaki KvK ta ricibi comentario regularmente di empresario expresando nan preocupacion encuanto e situacion economico y con e ta afectando nan empresa/negoshi, di cual algun ta hasta ta papia di lo mester cera porta pronto. En particular e negoshinan mediano y chikito (cu ta e mayoria) ta sintiendo e impacto grandi di e costo halto y creciente di "doing business" na Aruba. 

DUNA EHEMPEL DI REDUCI GASTO

“Mirando cu sector priva ya caba ta yegando su limiti di contribucion na sector publico, kizas lo por wordo considera cu ta keda na gobierno pa duna e ehempel di reduci gasto, opera mas eficiente y conciente pa asina por duna e economia e espacio necesario pa por florece y crece?” e presidente ta finalisa bisando.