Estreno Himno Aruba Dushi Tera '40' ricibi cu hopi emocion

ORANJESTAD - Un di e produccionnan musical mas anticipa pa 2016 a keda estrena diaranson atardi laat na Fort Zoutman, dilanti un grupo selecta di invitados, y unda cu e invitado principal tabata nos Gobernador Fredis Refunjol cu su famia completo. Ta trata di e grabacion audiovisual di nos himno nacional Aruba Dushi Tera, cu a haya e nomber Aruba Dushi Tera '40' cual grabacion a tuma lugar luna pasa na New York pa un orchestra simfonico di New York y interpreta pa 40 di nos talentonan mas cotidia musical di Aruba. Como un regalo di despedida pa nos Gobernador, conocido musico y productor Jonathan Vieira a presenta e grabacion na Gobernador, como aprecio pa e sosten cu semper Gobernador a brinda Vieira. 

PRODUCTOR JONATHAN VIEIRA

Vieira, cu a yama su mes un ‘amigo artista’, a pidi despensa pa kibra protocol y a yama Gobernador Refunjol na su prome nomber. “Despensami e protocol, pero danki mi amigo Fredis”, Vieira a bisa, den un intento genuino pa gradici'e pa su respaldo pa e produccion. Repasando full e proceso, Vieira a purba pinta un cuadro di e trabou cu tabatin envolvi pa por a logra e proyecto grandi aki. Un proyecto cu, loke cu NoticiaCla.com por a compronde, a nace na november di aña pasa y a materialisa comienso di e aña aki. E idea tabata pa 40 artista (representando 40 aniversario di nos himno) interpreta e himno, toca pa un orchestra simfonico di New Nork. Pa esey, a bula e musico y cantantenan pa New York pa dos pa tres dia pa e grabacionan tuma lugar. Varios detaye y anecdota a keda comparti diaranson anochi pa asina tur hende ‘compronde’ kico tur a bay den un produccion asina. For di e ‘egonan poni un banda’ te na e ‘cambernan cu e artistanan mester a comparti cu otro’, tabata notabel cu e no tabata nada facil y cu loke awe ta mustra como un simpel grabacion di nos himno, tabatin henter un produccion cu hopi dolor di cabes su tras. Gradiciendo un lista di persona, esnan na cabes sigur tabata mayornan di Vieira, Gobernador, y e sosten financiero di famia Raoul Henriquez y Rene Kan cu tabata algun di esnan cu a financia e proyecto aki. Vieira a haci'e un punto pa informa e mandatarionan presente (minister presidente Eman, ministernan Croes y Oduber) cu a tene gobierno afo pa evita cu esaki lo a bira algo politico. 

GOBERNADOR AGRADECI

Gobernador na su turno a gradici pa e oportunidad y tabata mas impresiona cu e cantidad di hoben cu tabata rondon'e riba tarima. A repasa e hecho cu hobennan ta nos futuro y cu un produccion asina, nos ta demostra cu no importa e tamaño di nos isla, cu nos por logra cosnan grandi, primordialmente pa un generacion nobo cu ta dun'e speransa pa futuro. Na final Vieira na nomber di e grupo grandi di sostenedornan patriotico, a entrega Gobernador Refunjol un recuerdo den forma di un plakkaat di glas. 

EMOCIONAN HALTO

Notabel tabata e emocionan tanto den publico como esnan riba escenario. Den publico tabatin mayornan di defunto Hildward Croes, cu na varios momento no por a contene nan emocion ora cu a presenta e cancion componi pa Hilward y interpreta pa e orchestra. E yiu muher di Hildward, Hillian tabatin e momento mas dificil durante e anochi. Riba tarima a nota emocionan di hopi artista grandi manera Jersey Isenia, Roger Peterson, y tambe Claudius Phillips. Tabata notabel cu e loke cu nan a haci, finalmente a ‘zink in’ y a haya su lugar diaranson anochi dilanti e publico. Un otro anectoda cu NoticiaCla.com a scucha, ta cu e momento mas dificil tabata na New York ora cu e musico y cantantenan Arubiano a tende e orchestra toca e himno pa prome biaha. “Lagrima tabata bin di tur banda” un di e musiconan a comparti cu NoticiaCla.com. Na final, e comentario tabata sumamente positivo, y tur hende tabata satisfecho cu e produccion final cu a keda estrena diaranson anochi. Aruba tin un hoya di un produccion awor, cu e por ta orguyoso di dje. Por mira e video completo aki.