Ley pa 'kinderopvang' ta solamente un comienso

ORANJESTAD – Aruba for di 1996 ta trata di regla 'kinderopvang' pa ley, sin resultado. Awor tin un concepto den parlamento, pero durante un presentacion na publico parce cu ainda tin hopi mas di haci ainda pa mas calidad den acohida. Prome publico a tende e resultadonan di un investigacion bou di centro di mucha di cero te cu cuater aña, cu Rosalin Kock a haci pa su estudio di Master. El a entrevista mayornan, lidernan di crèche y expertonan y puntra nan si nan ta haña cu e centronan ta cumpli cu e exigencianan di calidad pa educacion y condicionnan adicional manera alohamento y seguridad. “Mayornan y lidernan ta haña esakinan bon mientras cu expertonan no ta haña nan suficiente”, Kock ta comenta como resultado mas importante.

Nivel di e lidernan

Tog e ta confirma cu bo no por conclui awor cu e centronan ta cualitativanan bon. “Actualmente nos no tin ley y regla pa midi esaki. Mi a uza un modelo pero esnan cu a puntra nan no por midi esaki na nada y nan a uza nan propio interpretacion”. Un tercer parti di e lidernan no tin un educacion profesional y un tercer parti tin nivel di LBO. “Esaki kiermen cu nan no ta suficientemente na altura di criterionan y exigencianan di calidad. Kiermen sigur sigur mester di un ley di acohida di mucha, Kock ta bisa. Entre cero y cuater aña ta pone e base. For di mi investigacion a sali cu 95 porciento di e muchanan ta bay acohida 5 dia pa siman. Cu e ley nobo mucha por bai acohida 12 ora pa dia. Esey kiermen cu nan ta haña masha hopi cuido, y educacion eynan.

Permit

Tin casi cien (100) centro di acohida na Aruba. E cantidad ta crece. Tur hende por start un acohida y no tin control. Antes gobierno a yega di cera acohida pero esey tabata pa peliger di candela. Tur hende por traha como lider di crèche, hasta si nan tin un strafblad. Cu e ley nobo esaki ta cambia. Pa acohida di mas cu cinco mucha mester di un permit. Bo mester cumpli cu cierto exigencia. Cu un strafblad (por ehempel pa delito di fraude, contra moral of bida) un hende no por maneha un acohida ni traha na un. E exigencianan ta varia di masha detaya (cantidad di trahado pa mucha, areglo di keho, comision di mayor obligatorio) te masha general.

Subsidio

Kock ta bisa cu tin ‘muchu cos cu ainda ta vago’, pa por husga si e ley lo ta efectivo. E ta señala si cu e centronan di mucha lo haña hopi tarea acerca. Mientras cu nan tin nan mannan yen caba, cu tiki personal, pa tene e gastonan abou. Gobierno ta subsidia e acohida di despues di scol si (Traimerdia). Acohida di mucha pagabel ta masha importante, Kock ta bisa. Sigur pa Aruba caminda hopi hende ta gana sueldo minimo cu ta mas abou cu e nivel mínimo di existencia. “Nan tambe mester por manda nan yiunan un acohida cualitativamente bon.“

Autor Sharina Henriquez Ret Karibense Foto: De Schatkist