Elvis “Monster” Kuwas: Mi a admiti asesinato di Wiels basa riba presion di fiscal

WILLEMSTAD – Resistencia pa transmision di audio, confusion procedural di e caso y declaracionnan conflictivo a determina e curso di e prome dia di e caso Magnus na Corsou dialuna. Un caso pa cual a reserva henter un siman pa trate, y cu ya tin un fecha determina pa hues pa bin cu un veredicto y sera e caso grandi, Magnus finalmente. Den practica, e caso mes a haya su forma despues di merdia, y consecuentemente no a keda cla cu e prome sospechoso, debi na falta di tempo. Como tal hues a indica cu ta continua diamars mainta cu e tratamento di e sospechoso principal Kuwas.

Na inicio di e caso, abogadonan kier a purba alarga tratamento di nan respectivo cliente y como tal a pone varios fecha riba cual a trata e casonan di e otro respectivo sospechosonan. Cada uno a haya un fecha pa wordo trata. Despues a sigui e asunto di audio, unda cu tanto abogado(nan) como fiscal Rip a pidi pa para esaki na interes di nan cliente. Algo cu a wordo rechasa despues di a analisa e argumentonan prome. “Interes general ta pisa mas cu interes di e acusadonan” hues van Dam a declara. Y asina e caso por a cuminsa finalmente. Pero pa e ora ey, ya tabata practicamente merdia.

Despues di merdia e prome sospechoso a haya su chens pa bisa algo, esta Elvis “Monster” Kuwas, unda cu e la sorprende hopi prome, bisando cu e ta usa su derecho di keda keto pasobra eno ta envolvi den e caso aki mes. Riba insistencia di hues van Dam, Kuwas a splica e ora cu e‘no ta culpabel pasobra e no ta envolvi den caso di asesinato di Helmin Wiels”. Esaki siendo cu na comienso di anja e la declara cu e ta esun cu a tira Wiels mata. “Mi a haci declara esey pasobra mi a wordo poni bou di presion, ora cu nan a detene mi casa. Fiscasl a bisami cu si mi no bisa nada, mi ta bay sera pa bida largo. Si mi bisa algo, por traha un deal”. Esey a bolter full e caso, unda cu a keda cuestiona Kuwas riba su declaracion contradictorio diripiente.

Notable tabata e hecho cu Kuwas (cu a laga sa cu e la biba 20 anja na Hulanda) tabata papia un hulandes casi perfecto y cu e traductor tabata traduci solamente pa e comunidad pafo di corte por a tende y compronde esaki. Esey a trece basta tardansa tambe den e caso ya cu constantemente mester a para e declaracion pa e traductora por a haci su trabou.

Tur cos dialuna merdia a draai rond di un dvd, unda cu lo mester por a mira e combersacion entre e acusado y fiscal, y unda cu e fiscal lo ta ofreciendo e acusado un deal. E deal tabata cu si Kuwas haci cierto declaracionnan y tambe basha bow riba su demas ‘coleganan’ e lo por a evita di haya bida largo. Inicialmente fiscal no a gusta e idea mucho di pasa e dvd, pero na final, hues a bay di acuerdo pa haci esaki. “Mi a declara bou di presion. Pero awor mi ta retira mi declaracion completo. Mi no ta envolvi den e caso aki. Mi a uza informacion cu mi a compila di e caso, pa traha un storia, y e storia ey mi a bisa inicialmente” Kuwas a bisa. Den careda di 20 pa 5 di atardi, hues van Dam a sera e caso pa e prome dia y a anuncia cu e caso ta continua diamars mainta 9or. foto ta cortesia Anneke Polak.