Fundacion Gobernacion di Calidad kier stimula practica bon gobernacion

ORANJESTAD - “Stichting Deugdelijk Bestuur Aruba”, na papiamento l“Fundacion Gobernacion di Calidad Aruba” (FGCA) kier stimula atraves di tur medio legal na su disposicion e practica di bon gobernacion den tur aspecto. Pa logra esaki e fundacion lo recauda fondo pa facilita investigacion riba tereno specifico cu ta relaciona cu bon gobernacion, pa yega na conclusion basa riba hecho encuanto e situacion actual, y pa aporta cu recomendacion concreto na mehoracion di e situacion cu vista riba futuro. 

PUNTO DI SALIDA

E fundacion ta reconoce e trabou cu a ser haci caba den pasado den intento pa mehora calidad di gobernacion, cu a conduci na raportnan importante manera e conocido rapport ‘Calidad’, e informe di e comision ‘Mehran’ (rapport di National Committee on Public Finance), y varios protocol cu a keda acorda entre gremio empresarial, sindicato y partido politico. Ta e intencion pa tuma tur e iniciativanan di pasado como un punto di salida pa investigacion y evaluacion cu lo tuma lugar proximamente.

FAYO DI BON GOBERNACION DEN 30 AÑA

Segun e fundacion, lamentablemente por constata cu 30 aña despues di adkiri nos Status Aparte, unda cu nos mester a prueba cu nos ta capaz di garantisa bon gobernacion, esey ta leu di ta e caso. Sin pretende di menciona tur area problematico, por bisa cu maneho financiero y di recurso humano, falta di transparencia, patronahe politico, falta di planificacion, mehoracion di servicio na publico, ta areanan cu merece atencion. Y como cu no mester sinta warda pa gobernacion mes drecha su mes, ta kere cu ta bira tempo pa cuminsa cu iniciativa di ciudadano pa purba stimula practica di bon gobernacion.

INVESTIGACION

Pa e investigacionnan cu lo programa, lo haci uzo di e servicionan di diferente experto local riba e terenonan al caso, pa por garantisa un trabou profesional y confiabel. E fundacion ta posiciona su mes como un organismo cu no ta expresa ni apoya punto di bisto di ningun partido politico, pero mirando e caracter di e trabou cu ta desea di desplega, lo trata na mantene bon relacion cu tur partido, y tambe cu tur entidad den sector publico y priva.

DIRECTIVA

E iniciativa pa lanta e fundacion aki ta ser carga pa sres. Armand Hessels, presidente, drs. Leo Maduro, secretario y Servito Thijsen, tesorero, cu conhuntamente ta forma e promer directiva di e fundacion. Banda di e directiva e fundacion ta conta cu un ‘adviesraad’ den cual ta invita personanan di cierto prestigio profesional, cu ta bay yuda sostene trabou di e fundacion cu nan conseho riba e terenonan den cual e fundacion ta move.