Opendag Marinierskazerne na Savaneta programa pa 2 di mei proximo

SAVANETA - Riba 2 di mei 2016 lo tin e acostumbrado Open Dag na e base di Marinierskazerne na Savaneta.  E evento aki lo cuminsa for di 10:00 di mainta y ta bay te cu 4:00 di atardi riba e tereno di kazerne na Savaneta. E Open Dag tin dos meta. Na promer lugar e Open Dag ta destina pa laga e pueblo di Aruba cera conoci cu e trabounan di Marina Real, e Cuerpo di Marina, e militarnan di Arumil y Wardacosta pa Caribe Hulandes. Na otro banda e dia aki tin como meta pa recauda fondo pa un bon meta. E ganashi completo di e Open dag ta wordo regala na un fundacion of instancia cu ta estableci na Aruba.  E aña aki locual cu keda recauda ta bay pa: TortugAruba & Fundacion ban uni man pa cria nos muchanan. TortugAruba ta un instancia cu ta percura pa protege e turtuganan na y rond di Aruba. E organisacion aki ta consisti di un union di boluntationan cu ta protege e turtuganan. Na aña 2003 a institui un organisacion no dirigi riba ganashi y e organisacion aki ta consisti di 30 boluntario. TortugAruba ta percura pa educacion over di turtuganan y concientisacion publico. Y tambe nan ta protege e areanan unda e turtuganan ta pone nan webonan na costa y nan ta trata na acumula mas tanto informacion. Fundacion ban uni man pa cria nos muchanan ta un instancia cu ta provee desayuno na school pa muchanan di famianan menos afortuna. Lamentablemente tin na Aruba hopi famia cu tin poco recurso y nan yiunan ta bayendo school sin desayuna. Pa e muchanan aki nan desayuno cu nan ta haya na scol ta e cuminda mas di mas grandi cu nan ta ricibi den curso di full un dia.  Si e muchanan a haya un disfruta di un bon desayuno, nan por ta mas fit y nan por concentra mihor na scol.  Durante e Open Dag lo tin hopi pa mira y experencia na e kazerne. Lo tin diferente demonstracion espectacular, entre otro di Cuerpo di Marina cu su demonstracion amfibico. Pero tambe tin demonstracion di Arumil, Wardacosta y e cachonan di unidad di polis K9.  Di es manera aki ta brinda un y tur e oportunidad pa cera conoci cu e trabounan di diferente instancianan di gobierno.  Banda di e demonstracionnan aki tin tambe e posibilidad pa bo mes tambe participa activamente na diferente actividadnan interesante. Tin posibilidad pa bay core den boto, tira cu skopet (mester ta 12 aña bay ariba), hunga paintball, y mas. Nos a pensa naturalmente tambe na esunnan mas chikito: lo tin un skina pa mucha unda nan por disfruta di bula den trampoline, caricia burico, bula riba cusinchi di aire of pintamento di cara. Mescos cu e añanan anterior, lo tin tambe un mercado di purga. Akiden hendenan particular y empresanan ta ofrece nan productonan, cual lo ta uno hopi varia.  Pa mas informacion por tuma contacto cu sergeant  H. van Gemert, H.v.Gemert@mindef.nl(5926668). Musica no lo falta y ya pa algun aña cu exito ta presente  Cool-FM & Fresh-FM kennan lo percura pa tin un transmision life for di e diferente areanan di ehercicio y tambe e presentacion di diferente banda life. Aki por acudi tambe pa e pasa bocanan delicioso y bebidanan refrescante pa asina por difruta di e diferente actividadnan y shownan.  Durante e Open Dag lo tin tambe un rifa grandi tumando lugar. Pa bo tin e oportunidad pa gana un di e premionan fabuloso, bo lo por cumpra un of mas ticket na rason di Afl 2 Florin, cual lo ser destina pa un bon meta. Lo tin ticket di avion, weekend stay, dinner for two, tablets, hoyas, lesnan di dive y otro tripnan! Den e añanan anterior e Open Dag tawata un exito retundo. Casi 20.000 bishitante a transita dor di e porta. E aña aki e ta promete di bira atrobe un dia placentero dia 2 di mei proximo.