Si no cumpli cu conseho di CAFT na mei, por bin aanwijzing

ORANJESTAD - Si pa luna di mei, ora cu e Colegio di Supervision Financiero di Aruba (CAFT) bolbe reuni cu gobierno di Aruba, nota cu gobierno no a cumpli cu e recomendacionan haci den su ultimo carta riba e presupuesto 2016, e (CAFT) por resorta na conseha Conseho di Minister di Reino (Hulandes) pa duna Aruba un (otro) instruccion (aanwijzing). “Nos ta spera cu e no ta yega na esaki”, presidente di CAFT Age Bakker ta firma den un carta na gobierno, cu a keda publica dialuna riba nan website. 

OPTIMISTA PERO CAUTELOSO

Durante un conferencia di prensa dialuna atardi, miembronan di CAFT a repasa e puntonan aki y tambe nan combersacion cu varios protagonista di gobierno y otro institutonan di importancia. Mes momento, Bakker a sigura cu e kier keda cu un tono optimista, aunke cu nan ta simplemente ‘state the facts’, y ta keda na gobierno pa haci loke nan mester haci. “Nos ta simplemente recomenda”, Bakker a bisa, aunke ta conoci cu loke cu CAFT ‘recomenda’, te awor semper a wordo haci. “Mi ta contento cu den e 4 añanan cu mi ta cu C(A)FT, semper RMR a sigui nos consehonan” Bakker a bisa. Pues mientras cu ta conseho ta duna, nan semper ta converti den hechos. 

LOGRO PERO NO DEN FORMA CORECTO 

Manera cu Bakker a confirma dialuna na prensa, enberdad gobierno a ‘logra’ e norma poni den e ley cu ta regula e trabou di CAFT, esta Laft, ora cu a raporta cu pa 2015 a logra e norma di 2% di deficit, enbes di e 3.8% cu tabata stipula pa e aña ey. “Nos tin cu admiti cu gobierno a cumpli cu esey”, Bakker a bisa. Mes momento sinembargo, a bisa tambe cu nan no ta impresiona con a logra esaki pasobra e forma con a logra esaki, no ta e forma pa yega na dje. A papia di ‘meevallers’ unda cu pa logra e meta, a uza un forma no corecto y no structural y esey no ta positivo segun CAFT. 

PROMESANAN DI GOBIERNO SIN PRUEBA CONCRETO

Cu esey na bista, -den e carta cu a keda publica ayera- , CAFT a pone un meta pa gobierno di Aruba pa cumpli cu ne. Berdad cu a bay di acuerdo cu gobierno di Aruba pa dun’e un tempo te mei pa sinta atrobe y analisa e cifranan. Gobierno a pidi e tempo ey, mirando cu aworaki ta trahando riba un posibel acuerdo pa compra di e refineria cu na su turno por genera e fondonan necesario pa sana e presupuesto di su deficit. CAFT a mustra cu ta compronde esey y a duna nan e tempo, pero e ta keda solamente na pensamento, pasobra ‘no por a presenta ningun contracto of acuerdo firma’, pues CAFT no por comproba cu tur e intencion ey enberdad lo materialisa. 

CONDICIONAN PA GOBIERNO CUMPLI CUNE

Cu esey, CAFT a propone un lista di 5 punto cu gobierno mester por cumpli cu ne pa ora cu nan bolbe topa na mei, y basa riba e resultado di e reunion ey, lo analisa atrobe kico ta kico y duna nan proximo opinion. Y si e opinion ey no ta positivo, lo conseha gobierno di Reino pa tuma e pasonan necesario. Pasonan cu CAFT ta anticipa caba cu no lo ta postivo pa gobierno di Aruba. E puntonan entre otro ta encera miho argumentacion di e implementacion di e accion di coleccion di fondo sea pa medio di VAS, of cualkier otro forma, miho argumentacion di e coleccion di fondo relaciona cu e reapertura di e refineria y con esaki lo sosode, uzo di e estimacion nominal di Banco Central, preparacion di e introduccion di e ABB (Algemene Bestedings Belasting) of ‘un metodo similar’ pa 1 di juli 2016 y si no logra esaki, sea politicamente of huridicamente aumenta e porcentahe di BAZV pa e mesun fecha esta 1 di juli 2016. Ademas, CAFT ta pidi pa raporta e cifranan anual mas efectivo tambe. 

CRECEMENTO ECONOMICO NO REALISTICO

Un di e kehonan tambe di CAFT ta cu e cifranan di gobierno pa loke ta e crecemento economico no ta realistico. Gobierno ta papia di un crecemento economico di 3.8%, mientras cu propio cifra di Banco Central ta papia di apenas 2% na 2015 y pior ainda na 2016 apenas 1.8%, pues dos porciento menos cu e loke cu gobierno ta pronostica. 

PROHIBI PA FIA PLACA SI NO TA PA DEBE EXTERNO

Mientras cu CAFT enberdad a conseha positivo pa Aruba por fia placa riba mercado internacional, esaki tabata exclusivamente pa por paga e compromisonan financiero den exterior y evita cu Aruba drenta den default cu su creditornan internacional. Pero ta confirma cu tanten cu Aruba, segun CAFT, no cumpli cu puntonan menciona, no por fia placa pa paga debenan local. Si pa mei, CAFT nota cu gobierno subi mercado y haci prestamonan toch pa cumpli cu e parti aki, CAFT lo conseha gobierno di Reino contra esaki y esaki por nifica un instruccion. “Algo cu nos ta spera cu por wordo evita” Bakker ta finalisa den su carta dirigi pa minister di finanza Angel Bermudez. Lesa e carta original aki.