Minister Hooyboer: Boogaard lo no a gusta cu lo termina nan contracto pa studiantenan

ORANJESTAD –  Gobierno a opta pa cambia e compania Boogaard Assurantien BV pa un otro compania. Esaki pasobra segun e mandatario encarga cu enseñansa, Michelle Hooyboer, despues di 20 aña a bira tempo pa sondea un otro compania pa presta e servicio ey. Como tal a manda bisa e compania pa medio di un carta, cu nan lo para e servicio di nan entrante fin di aña. Como tal a dicidi cu ta laga e compania Boogaard core te fin di aña pero mientrastanto a informa e compania cu na october ta habri e oferta pa otro compania.

E ta e derecho di gobierno pa busca un oferta mas barata y miho calidad. E mandatario ta kere cu e hecho cu a informa e compania actual cu no ta continua cu nan ‘sin mas’ a pone cu nan no ta contento cu e situacion y a opina recientemente pa medio di un comunicado indicando cu nan ta disgusta. No ta conoci cua compania lo bay tuma esaki over di Boogaard. Porta nan mes keda, dependiendo e oferta. Mientrastanto e mandatario a confirma na NoticiaCla, entrante 1 januari 2015, tur studiante ta haya un seguro nobo, cual proceso lo cana  automaticamente. Un siman pasa e compania tabata basta disgusta cu e trato cu nan a ricibi di gobierno pa cu e proceso di seguro, y a laga esaki sa pa medio di un comunicado na prensa. (lesa e comunicado aki).