Diaranson elenco di musico lo presenta producto final di New York na Gobernador

ORANJESTAD - Despues di hopi anticipacion, e produccion realisa recientemente na New York pa 40 musico y cantante Arubiano lo keda presenta diaranson atardi na Gobernador Fredis Refunjol. E intencion ta pa diaranson atardi durante un recepcion special, Gobernador Refunjol ricibi e produccion aki oficialmente como un regalo di despedida. Lo ta presente e elenco artistico Arubiano y sostenedornan patriotico, cu hunto cu e productor Jonathan Vieira lo haci entrega di e presentacion di e.o. nos Himno Nacional di Aruba.  E intencion tabata semper pa keda cla cu e produccion prome cu 18 di maart, y ta parce cu esaki a logra tambe.  NoticiaCla.com a compronde cu Gobernador Refunjol y su famia completo lo ta presente pa ricibi e bunita regalo aki na su honor. 

NEW YORK

Manera ta conoci, recientemente un grupo di como 40 musico y cantante Arubiano a biaha pa New York unda cu nan a canta y toca e himno hunto cu e orkesta filharmonico di New York. Un produccion cu tabata den man di conocido musico Arubiano Jonathan Vieira. Esaki ta prome biaha cu ta haci un produccion asina di e himno, desde cu esaki a wordo graba pa un orkesta filharmonico na Venezuela e tempo ey.