Fin di juni por cuminsa procesa personanan pa cedula nobo atrobe

ORANJESTAD - E compania encarga cu e proyecto di cedula nobo pa Aruba, ta premira cu pa fin di juni por cuminsa procesa e cantidad di persona cu cedula nobo. For di e informacion cu nan tin, a keda estableci cu tin un retraso di 13.000 cedula cu no por a wordo duna for di 2014. E grupo aki lo mester bin na remarca ora cu e proceso bolbe cuminsa. Esnan encarga a splica cu e proceso ta uno rapido, sigur y cu si tur cos cana manera mester ta, den apenas 3 luna di tempo, mester por tin tur cos actualisa y cu tur hende mester por tin su cedula nobo atrobe. 

PERIODO MAS CORTICO PA HAYA CEDULA

Si antes un persona mester a warda 3 pa 5 siman pa su cedula for di momento cu e haci e peticion, awor esey lo ta pa pasado. Den cuestion di 15 minuut cada persona lo dura for di momento cu e yega Censo pa procesa esaki, te ora cu e bandona e sitio cu su cedula completamente nobo. 

DETAYE DI E CEDULA

E cedula lo ta di e mesun material cu esun actual di rijbewijs, esta polycarboraat, y tambe e mesun costo cu e tabata esta 40 florin pa persona di 12 aña y mas halto. Esnan bou di 12 ta paga 10 florin pa e cedula. Unabes cu nan ta cla pa cuminsa, Censo lo informa tur esnan concerni debidamente pa por cuminsa procesa esaki.