Na december ta introduci parkeermeter na Aruba

ORANJESTAD – Entrante 1 di december di e anja aki lo cuminsa pone ‘parkeermeter’ den centro di ciudad na Aruba y 1 di januari 2015 den e area hotelero. Esey a keda confirma dialuna mainta pa minister di transporte Otmar Oduber. Un decision cu gobiernonan for di 2005 a bin ta discuti y awor a keda concretisa. A dicidi cu enves di pasa e proyecto aki pa tercera parti, a pensa cu e ta un bon entrada extra pa e compania nacional di transporte Arubus.

E aspecto legislativo y operacional ta den proceso aworaki, y den un reunion dialuna mainta durante un reunion cu gerencia di Arubus, a haya e luz berde cu ta mustra cu ta logra 1 di december pa pone e parkeermeternan. Ainda tin cu dicidi cua tipo di meter lo wordo poni, y e decision ey lo cay e siman aki. Ta trata di un cantidad di 5 diferente tipo di parkeermeter cu lo por wordo poni. E compania sinembargo cu ta bay hacie pa Arubus, si ta conoci caba segun e mandatario a sigura dialuna mainta.