Pronto pasahero di transito no mester pasa den di dos screening na Corsou mas

WILLEMSTAD – Representantenan di industria di aviacion di e islanan Aruba, Bonaire, Corsou y St Maarten a topa pa finalisa e ‘One Stop Security’ agreement. Esey ta nifica cu entrante mitar di 2016, pasaheronan di transito no tin cu pasa den un di dos screening na e aeropuerto di Corsou. Esey ta permiti un fluho mas liher pa e pasaheronan na e aeropuerto y tambe aumenta e comfortabilidad di e pasahero. Esaki ta nifica tambe cu pasaheronan cu transfer, incluyendo nan maleta, lo no tin cu pasa un otro screening prome nan drenta e area di departure, unda cu nan tin cu warda pa aborda nan siguiente buelo di coneccion. Esaki pasobra e pasaheronan lo a pasa un screening similar na e pais unda cu nan a aborda inicialmente.  Ora cu e pasaheronan aki transfer na Corsou, un agente di gate lo guia e pasaheronan mesora pa nan respectivo gate, sigurando cu ta solamente e pasaheronan di transfer ta drenta e area ey. Foto cortesia CuracaoChronicle.com