CAFT:‘Haci esfuerso den 2016 pa fortalecemento structural di finansa publico’

ORANJESTAD – Durante nan bishita na Aruba diamars, e Colegio di supervision financiero di Aruba CAFT a mustra gobierno riba e necesidad pa den 2016 presenta mas trempan den aña un vision di con e situacion financiero di Aruba ta evoluciona. Un prome oportunidad ta presenta ora cu na mei Colegio emiti un conseho mas detaya tocante e presupuesto di 2016. Banda di esey e posibel reapertura di e refineria tin un efecto substancial riba e presupuesto. E colegio a conseha pa haci un analisis di e beneficionan y e riesgonan pa e presupuesto, den cual ta incorpora e posibel efectonan pa medio ambiente. Anteriormente e colegio a conseha Conseho di Minister di Reino pa bay di acuerdo cu un prestamo di Aruba pa un suma di  USD 100 miyon. 

DELIBERACIONNAN DI CAFT 

Durante su bishita na Aruba CAft, consistiendo di presidente y miembro Age Bakker y e miembronan Sybilla Dekker y Robert Croes, a delibera cu diferente instancia. Durante e bishitanan na Gobernador, Minister di Finansa, Conseho di Minister, e Comision di Finansa y Asunto Economico di Parlamento di Aruba y Banco Central di Aruba (CBA) a toca, entre otro, e hustificacion di e agotamento presupuestario di 2015 y e evaluacion mas detaya di e presupuesto di 2016 na mei 2016. Ademas a aborda e tema di e presupuesto di 2017, cu ta den preparacion y cu, segun e planificacion actual, lo por entrega na tempo y conforme e propio disposicionnan legal di Aruba. Durante e bishitanan a informa Colegio tocante e desaroyonan rond di e refineria, e fondonan social y e desaroyonan den turismo. 

PRESUPUESTO DI 2016

Di acuerdo cu e palabracionnan haci na december aña pasa entre CAft y Aruba, un evaluacion mas detaya di e presupuesto di 2016 lo tuma luga na mei. Lo incorpora den dje e cifranan di realisacion di e prome kwartaal di 2016. Na e momento ey probablemente lo ta conoci si tin reapertura di e refineria na San Nicolaas y ki dia esey lo tuma luga. E reapertura aki lo percura, manera por spera, pa un fluho di recurso tanto directo como indirecto den caha di gobierno. Gobierno ta spera cu door di e recursonan aki lo por absorba completamente e percancenan eventual, manera cu CAft a adverti den su consehonan relaciona cu e presupuesto di 2016. Colegio ta enfatisa cu pa un bon evaluacion di e efectonan financiero economico di reapertura di e refineria, e lo mester tin acceso na tempo na e contratonan den cualnan ta incorpora e recursonan cu ta spera. Ademas di esey Colegio ta conseha pa elabora un analisis di riesgo den cual ta incorpora e posibel costonan pa e presupuesto den futuro, cu lo por emana di e construccion scogi segun cual Aruba ta bira doño di e refineria y como consecuencia lo mester carga e posibel gastonan cu ta mara na e efectonan perhudicial pa medio ambiente. Aruba ta bay contrae un prestamo di USD 100 miyon riba mercado internacional cu ta particularmente necesario pa refinanciamento di debe cu ta caducando. Conseho di Minister di Reino a bay di acuerdo cu esaki dia 11 di maart, despues di a pidi conseho cerca CAft, cu a conseha positivamente.

E DI CUATER REPORTAHE DI EHECUCION DI 2015

E cifranan di e di cuater reportahe di ehecucion ta mustra cu Aruba a cera aña 2015 cu un deficit di 2,0% di e PIB. En bista cu, conforme e Ordenansa Nacional di supervision financiero di Aruba (LAft), e norma deficitario di 3,7% di e PIB pa 2015 tin di haber cu e sector colectivo di Aruba, CAft a coregi e realisacion di Aruba pa e exoneracion di e debe di Aruba na Banco di Seguro Social (SVb) di AWG 60 miyon, cu en realidad no tin efecto riba e deficit di e sector colectivo di Aruba. A base di e coreccion ey e realisacion provisional di Aruba ta yega na 3,2% di e PIB. Aki mester haci e observacion si cu, cu introduccion di e sistema VAS, a hala dilanti e entradanan di impuesto riba ganashi, cu un rendemento incidental na 2015, cu di otro forma lo a materialisa na 2016. E golpinan di suerte incidental aki ta matisa e imagen subyacente y ta manifesta claramente cu e retonan structural ta keda existi. Banda di esey ta keda necesario pa mantene cierto cautela ora di interpreta e cifranan di agotamento, tumando na cuenta e calidad di e administracion financiero di Aruba, y en bista di e echo cu e calculacion di e PIB di Banco Central di Aruba cu a uza ta data di april 2015. Colegio a puntra Banco Central di Aruba si ta posibel pa actualisa e realisacionnan y e calculacionnan di e PIB regularmente.