A para Carubbian Festival pa re-evalua e producto y no pa mal maneho

ORANJESTAD – Carubbian Festival a para pasobra mester a re-evalua e producto su nivel di operacion. Segun e mandatario di turismo Otmar Oduber, ora cu un evento bay di 15 stand di cuminda pa 4 y mas cos ainda, bo tin cu reevalua esaki y trece bek na su forma original. Esaki ta pensamento di minister encarga cu turismo, Otmar Oduber. E la admiti cu e festival tabata para pa un tempo, y cu 14 di augustus proximo e ta bolbe cuminsa.

E festival pa ultimo 3 aña tabata exitoso, pero na ultimo esaki a cay basta y a dicidi pa para esaki un rato. E ta un festival basta caro, si tene na cuenta cu e transporte so pa e evento ta costa por lo menos 80 dollar. Y pa un suma asina, e persona cu bishita e evento, mester haya e balor pa su placa cu e ta paga. E ta un di factornan principal cu ta hacie caro y ta e punto negativo pa hacie na San Nicolas. Facilmente, segu e mandatario, por a tene e festival na Playa y ofrece un suma mucho mas barata pe. “E ta un escohencia. Bo mester crea y mantene un actividad pariba di nos isla” Oduber a sigui bisa.

Oduber a sigura NoticiaCla cu e paro ningun momento ta debi na mal maneho, cu placa por a disparce y cu cierto proveedonan no a wordo paga. Berdad tin cierto cuentanan habri cu lo wordo paga, pero definitivamente no ta pa motibo di mal maneho di e ekipo cu ta presenta e festival tur siman. Loke si e mandatario no por a clarifica na NoticiaCla, ta pakico mes momento a cancela Bon Bini Festival na Fort Zoutman te proximo aviso. “Mi no tin ningun idea” e mandatario a contesta NoticiaCla. Foto carubbian festival, cortesia aruba.com.