Eman: Gobernador Refunjol a acepta pa extende su termino

ORANJESTAD - Gobernador Fredis Refunjol a bay di acuerdo pa ‘extende’ su termino di Gobernador cu por lo menos 4 pa 5 luna. Asina prome minister Mike Eman a confirma na NoticiaCla.com dialuna mainta. Cu e proceso di scoge un Gobernador nobo lo no keda cla na tempo, -esta pa comienso di mei ora cu oficialmente e termino ta vence, a keda confirma pa Eman ora cu el a mustra cu ‘pa september of october, a mas tarda numa, Aruba lo tin su Gobernador nobo’. Mientras cu oficialmente e termino di Gobernador actual ta termina 1 di mei proximo, ta practicamente imposibel pa gobierno di Aruba keda cla na tempo pa presenta su lista di candidato na gobierno di Reino. “Nos no kier traha ‘apresura’, e mandatario a sigui bisa. Den pasado esey a sosode caba ora cu e ultimo termino di e Gobernador e tempo ey, Olindo Koolman, a keda prolonga cu 5 luna. E termino mester a vence na januari di e aña ey, pero no por a keda cla y a bay di acuerdo cu e prolongacion. Como tal, e termino awor a move pa mei di e aña aki ora cu e di dos termino (di 6 aña) vence. 

PROCESO PA SELECCIONA GOBERNADOR

E proceso cu normalmente mester ta uno interno y ‘secreto’, cu no ta bira conoci te ora cu gobierno di Reino aproba e nomber, e biaha aki a bay diferente. E proceso segun statuut ta cu gobierno di Aruba (of otro pais autonomo) den Reino ta presenta un lista di nominacion di personanan cu e ta kere cu tin e cualidadnan pa bira un gobernador. NoticiaCla.com a compronde di su fuentenan y e investigacion haci, cu e lista mester tin por lo menos 3 nomber. Y ta keda na gobierno di Reino pa dicidi finalmente ken nan ta selecta. E persona mester ta integro, no mester tin ningun ‘bagage’ problematico, por presenta su mes bon, delibera bon y ta un persona prepara den varios faceta. Basa riba e informacion cu keda presenta na gobierno di Reino, nan ta dicidi finalmente. Aruba por bien tin su favorito, pero no ta na Aruba pa dicidi. Esaki ta logico, mirando cu gobierno di Reino ta esun cu ta cubri gasto di e funcion y instituto aki completamente pa su cuenta, y como tal kier tin e ‘total say’ den esaki.