Eman: Admiti cu bo ta candidato pa Gobernador no mester ta problema

ORANJESTAD - Loke a sosode den fin di siman, ora cu un di e candidatonan pa puesto di Gobernador a ‘publicamente confirma su candidatura' na NoticiaCla.com, creando un tipo di ‘mini crisis’, segun prome minister Mike Eman a bisa, cu e no ta kere cu esaki lo perhudica e candidato cu tabata meymey di henter e asunto aki, esta actual minister di finanza Angel Bermudez. “Mi no ta kere”, Eman a confia e portal aki. E hecho cu Bermudez a confirma cu e la wordo puntra, pa Eman no mester strob’e of cualkier otro candidato apto pa ta den contienda pa e funcion actual. 

BERMUDEZ A CONFIRMA SU CANDIDATURA

Tabata diasabra cu e mandatatario di finanza a confirma na e portal aki, cu no solamente el a wordo pidi pa ta gobernador, sino tambe cu el a acepta contal cu dun'e tempo pa e caba cu su trabou. Y esey ta ora cu e keda cla cu e presupuesto di 2017 cu mester wordo entrega na september 2016.

Cu esey, Eman ta duna un otro indicacion cu Bermudez ta e candidato principal pa e funcion. Esaki basa riba e hecho cu e mes a bisa cu lo por dura te september of october pa e keda cla. Di otro banda, Eman a bisa si cu tin lo entrega un lista cu ‘mas cu un persona’, pero e indicacion ta cu Bermudez ta keda number uno riba e lista, basa riba e informacion cu Eman mes a duna. 

EMAN MES A LOS INFORMACION ‘INTERNO’

Porta ta Eman mes ta esun cu a cuminsa cu e ‘reparticion di informacion’ riba e tema, ora cu algun siman pasa NoticiaCla.com a haci’e pregunta riba e desaroyo pa scoge un candidato pa e funcion. E hecho cu e mandatario a contesta e pregunta ‘asina amplio’, a pone cu su contesta porta a crea mas cuminda pa investigacion periodistico. Informando prensa cu enberdad e proceso ta canando, e mandatario a bay asina leu di bisa cu ‘si, a aserca un persona caba, a puntra si e ta politico y e mandatario a bisa cu no. “For di e contestanan ey a bin hopi speculacion”, Eman a sigui bisa. 

DIFICIL PA TENE E INFO ‘INTERNO’

E ta compronde e situacion cu a surgi y a mustra cu ni na un pais manera Merca, e proceso pa busca p.e. un miembro nobo pa corte supremo of na Hulanda ora cu un Rey of Reina ta baha pa otro subi, nombernan por keda scondi mas. Ta comun cu nombernan ta cuminsa circula pues hasta den paisnan grandi, corda uno chikito manera Aruba. “Tin hopi informacion eyfo. Ma tende hopi nomber wordo menciona. Algun tin e parcial corecto, otronan full corecto otronan no tin nada corecto” Eman a bisa. Mientras cu e ta un proceso hopi interno pa busca un candidato pa bira Gobernador, Eman ta compronde cu awe ta dificil. “Dificilmente por pidi periodistanan pa no specula (riba e nombernan)” Eman a finalisa bisando.