Otmar Oduber: Ningun retiro a cay na Riu Hotel

ORANJESTAD –  “Ningun momento tin retiro a cay of ofrece pakete na e hotel Riu Palace hotel of e casino. E hotel ta completamente yen” Palabra textual di e hefe maximo di e hotel na Aruba, Richard Velazquez segun minister di turismo, Otmar Oduber a declara dialuna mainta. E la reconfirma cu ningun pakete a wordo ofreci y cu e hotel ta completamente yen y no tin ningun motibo pa manda hende cas y of ofrece retiro na ningun trahado. E mandatario a lamenta cu cierto medionan a circula noticia negativo cu no ta berdad. Noticianan a sali den fin di siman cu lo tin retiro ta cayendo na e hotel aki, y tambe a ofrece pakete. Esey pues no ta cuadra cu berdad segun e mandatario.

Segun e mandatario, ta bruhando dos cos den otro. Si un trahado wordo ofreci un pakete, y e persona acepta, no kier men cu bo a kite for di trabou. Un hende cu acepta un pakete, a retira di forma boluntario segun splicacion di Oduber. Si e no acepta esey, ley di labor ta proteha e trahado y tin cu cuminsa un proceso di retiro via corte. E mandatario a bay asina lew di menciona nomber di e fuente di noticia cu lo ta sacando e informacion, cu ta Solo di Pueblo liga na partido MEP segun e mandatario. Tambe e rednan social rond di e fuente di noticia aki. E ta lamenta e asunto aki. Oduber a referi tambe na e noticia di posibel seramento di Raddison hotel, tratando esaki como noticia nobo siendo cu e noticia tabata uno conoci caba. 

Mes momento, e corant y donjo di e corant, ya caba a reacciona riba e asunto indicando cu e la tuma nota di e mandatario su informacion, y cu e ta wardando e documentonan cu ta demonstra cu e mandatario no ta papiando berdad. Aki e ta referi na posibel contracto of cartanan cu e trahadonan aki lo a haya y cu lo bin cune como prueba.