Miembronan di gang di arma di candela condena cu castigonan halto

ORANJESTAD - Corte den Prome Instancia a recientemente dicta sentencia den un caso grandi contra un organisacion criminal, cu tabata ocupa su mes cu importacion y benta di armanan di candela. Corte a ademas dicta castigonan fuerte contra dos cumprador di arma di candela. E tratamento di e caso a tuma lugar riba 4 y 8 di maart ultimo.

E investigacion

Polis a cuminsa, bou guia di Ministerio Publico, na november 2015 cu un investigacion dirigi contra e accionnan di e grupo aki. Apenas dos siman despues, ocho sospechoso a wordo deteni na Aruba, di cual cinco tabata forma parti di e organisacion criminal. Durante e investigacion, siete arma di candela a wordo tuma den beslag. Den e dos siman ey di tempo, e organisacion a trece armanan di candela di Venezuela pa Aruba, bende algun arma di candela y traha plan pa trece mas arma ainda Aruba desde Venezuela. E sospechosonan ta di descendencia Arubiano, Venezolano y Colombiano y ta varia den edad di 16 te 51 ana. Polis y Ministerio Publico tabatin bista riba otro sospechoso importante den e tempo ey, y el a wordo, despues cu Aruba a pasa e informacion aki pa autoridadnan Venezolano, deteni pa polis Venezolano pa Venezuela mes. E sospechoso aki ta sinta den detencion preventivo na Venezuela y lo wordo enhuicia ey tambe. E ta conta como lider di e banda aki.

E castigonan

Manera menciona caba, ta trata na Aruba di ocho sospechoso. E participantenan na e organisacion criminal ta e Arubiano E.D.B. (29), e Venezolanonan H.B. (44), V.A.C.C. (21)  y K.A.B.L. (36) y e Colombiano E.A.E.B. (21). Contra cada uno di e sospechosonan aki fiscal a exigi 6 ana di castigo di prizon. E sospechosonan B., H.B., C.C. y E.B. a wordo condena pa castigonan di prizon di 4 aña, di cual 1 ta condicional y un tempo di prueba di 2 aña. E sospechoso B.L. a wordo condena pa un castigo di prizon di 40 luna, di cual 10 luna ta condicional y un tempo di prueba di 2 aña. 

E cumpradornan

Dos di e otro tres sospechosonan ta cumpradornan di e armanan di candela. Ta trata di e Arubianonan M.R.L. (51) y M.E.T. (17). E sospechoso L. a wordo condena den pasado na diferente ocasion pa violacion di e Ley di Arma di Candela. Na momento cu el a wordo deteni pa Polis, e tabatin dos arma di candela cu ne riba caminda publico, di cual uno cerca di dje. Fiscal a exigi 18 luna di castigo di prizon contra dje. Hues a dicta conforme e exigencia aki. Contra e sospechoso T. fiscal a exigi 12 luna di detencion hubenil, di cual 4 ta condicional y un tempo di prueba di dos aña. Contra e sospechoso E.J.V.S. (16) fiscal a exigi detencion hubenil di 87 dia, di cual 30 dia ta condicional, y un tempo di prueba di dos ana. V.S. tabata socia cu e sospechoso L., di mucho mas edad cu ne, y tabata sinta den su auto na momento di su detencion. Hues a dicidi den tur dos caso conforme e exigencia.

Man duro

Aruba ta un di e islanan den Caribe di mas safe y Ministerio Publico kier pa e keda asina. P'esey e combatimento di posesion di arma di candela lo wordo intensiva den e fase di persecucion. Lo actua cu man duro y exigi castigonan halto pa aumenta e seriedad y e prevencion general y especial. Esaki no solamente pa stop e sospechosonan cu ta wordo hiba Corte pa bolbe comete hechonan castigabel den futuro, pero tambe pa spanta y desanima hende pa nan no kere cu na Aruba nan lo por gana placa facilmente bendiendo arma di candela.