Taxistanan ta keha riba falta di seguridad pa nan por haci nan trabou

ORANJESTAD - Taxistanan ta keha riba falta di seguridad pa nan por haci nan trabou. Minister di Husticia Arthur Dowers, tabatin un serie di reunion cu algun taxista y den e ultimo reunion tabata tin un grupo di taxista representante di e asociacionnan di taxista, caminda cu a trece diferente keho dilanti. Aunke cu e “toezicht” pa loke ta e taxistanan ta cay bou di DTP, no bou di Ministerio di Husticia, toch e mandatario a scucha e preocupacionnan pa mira unda por haci un cambio. 

SEGURIDAD PA TAXISTA

Taxistanan ta haya ta necesario pa presenta na Ministerio di Husticia pa trece nan keho. Por a mira cu cierto cos tin di haber cu por ehempel siguridad, siguridad di e taxista, pero tin hopi cos cu tin di haber cu e parti di maneho. Lo tuma contacto pa duna sugerencia si nan kier adopta nan pa asina ey aumenta e aspectonan ey di siguridad, pero tin un otro parti cu a bin dilanti, por ehempel e parti di taxi pirata. A bin tambe dilanti, e asunto di cambionan di trafico cu por stroba e forma con un taxista por yega na e luga cu e mester yega y door di esey por mira tin biaha cu nan ta haci cierto maniobranan cu ta evita otro chauffeurnan di trafico. 

FACILITA TAXISTANAN

Segun e taxistanan, lo ta bon si por tuma un poco tempo con por facilita nan tambe den nan trabou y ta para habri pa esaki. Un di e cosnan cu a resalta ta cu e taxistanan ta consciente di e riesgonan cu nan ta core y ta duna un indicacion hopi cla y ta interesante pa tende loke nan ta biba tur dia cu ne, loke nan ta mira y encontra, na momento cu nan ta traha, principalmente cu turista.

TRAHA PREVENTIVO

A bin riba otro puntonan cu por traha preventivo. Lo bay tin reunion cu otro partnernan den e dianan cu ta sigui pa mira den ki forma por coopera hunto cu otro pa por bay atende cu e asuntonan aki.

TAXISTA PIRATA

Un di e cosnan cu a propone cu pa den e sector di turismo, pa nan bin cu notificacionnan, kico ta un taxi legal riba nos pais pa asina informa e turista di biaha pa e no bay haci uzo di e taxinan pirata pa asina reduci e riesgo cu nan por core na momento cu nan subi den auto cu nan no ta cumpli cu ningun rekisito di siguridad y cu e persona cu ta core den auto no tin indicacion tampoco cu ta un persona cu bo por confia si of no. "E cooperacion ey lo mester bay bin y lo bay combersa den e siman cu ta sigui cu AHATA pa mira unda nan lo yuda den logra e tipo di medidanan preventivo aki y reduci riesgo, pero oportunidad  pa nan comete cosnan ilegal," e mandatario a splica.