Willem III Toren e monumento cu ta identifica Earth Hour na Aruba

ORANJESTAD - “Pa tin Willem III Toren riba mapa internacional como e monumento reconoci pa Earth Hour International ta un gran honor", asina e manager di Museo Historico, esta Joase-Ann van der Biest ta bisa entusiasma y e ta contento pa mira e imagennan di Willem III Toren y Fort Zoutman cu pa e prome cinco añanan di e celebracion di Earth Hour na Aruba a circula internacionalmente. Riba diasabra 19 di maart Earth Hour Community Group Aruba ta celebra Earth Hour pa e di seis biaha y for di e prome aña caba, a scoge Willem III Toren como e edificio iconico pa identifica e evento na Aruba.

COMMUNITY GROUPS

Rond mundo e diferente "community groups" na diferente pais y den varios ciudad ta haci peticionnan special pa paga e luznan di un edificio iconico pa un ora, entre 8'or y mey y 9'or di anochi. Durante di e ora aki, yama Earth Hour ta tuma un momento pa, entre otro, refleha riba e compromiso cu cada persona tin cu Mama Tera, pa cada persona cera un compromiso nobo pa e aña nan dilanti pa cu un bida mas sostenibel.

TRADICION ANUAL

Rond Aruba Earth Hour a bira pa algun famia y scolnan un tradicion caba, un momento pa paga tur luz, television y otro aparatonan electrico y electronico no necesario, y disfruta di un ora ameno hunto ta combersa, come y comparti. Actualmente na Aruba ta conta tambe cu participacion di diferente hotel y nan huespednan.

DETAYES DI E EVENTO

E evento pa Earth Hour ta cuminsa cu un "glow in the dark" fun walk di 3 kilometer cu ta cuminsa y caba na Fort Zoutman. Lo tin T-shirt y obhetonan “glow in the dark”, den un cantidad limita, pa e participantenan. Na cabamento di e caminata ta invita tur participante pa presencia e pagamento di luz y uni na e celebracion paden di e forti, cu cendemento di bela y otro actividadnan. Earth Hour na Willem III Toren/Fort Zoutman, incluyendo e caminata, ta un evento gratis.