Colegio Arubano a participa na e Wiskunde A-lympiade na Garderen Hulanda

ORANJESTAD- Un delegacion di 4 alumno y un maestro di Colegio Arubano ta na Garderen Hulanda pa participa na e competencia di Wiskunde A-lympiade. Emile Celaire, Laura Croes, Jillian Oduber y LeAnn Tromp, acompaña pa nan docente mr. Ricky Quant, ya caba a finalisa nan tarea pa e competencia y a presenta esaki diasabra ultimo na e panel di hurado. Dentro di cuater siman e resultado final lo bira conoci. 

AMBICION 

Participacion na e Wiskunde A-lympiade ta un forma excelente pa e alumnonan cu tin interes den matematica y cu tin ambicion pa sigui den e ramo aki den nan estudio. Laura Croes, alumno di VWO 6 y miembro di e team Be Greater than Average ta conta: “E problemanan cu mester resolve pa e competencia di Wiskunde A-lympiade ta problemanan realistico unda cu bo ta aplica matematica den un otro contexto.” Jillian Oduber cu por sierto tin e cifra di mas halto den VWO 6 pa wiskunde B y wiskunde D ta agrega: “Matematica ta mi materia faborito na Colegio Arubano. Participando na Wiskunde A-lympiade ta duna mi un desafio mas grandi cu scol y les unicamente”. Emile Celaire tambe tin e cifra mas halto pa Wiskunde B den e tercer school-examen. Emile ta ancioso pa sa kico e tarea lo ta y kico e otro teamnan di Hulanda, Inglatera, Dinamarka, Sint Maarten y Iran lo presenta. Por ultimo LeAnne Tromp ta finalisa bisando: “Durante mi carera na Colegio Arubano mi tabata biba pa e momento aki. Mi tabata tin hopi animo pa bai Singapore pa e International Math Challenge, pero esaki ta den e periodo di examen. Cu mi por bai Hulanda pa participa ta hopi bon tambe paso mi kier sigui studia Applied Mathematics na Delft University of Technology. E tareanan na e Wiskunde A-lympiade ta duna mi un oportunidad pa mi experiencia con mi estudio lo ta”.

DOCENTE DI MATEMATICA

Docente di matematica  Ricky Quant ta organsado di e Wiskunde A-lympiade pa mas cu 10 aña na Colegio Arubano. E alumnonan ta forma un team di cuater y ta inscribi pa participa na e ronda di cualificacion cu ta tuma lugar na Colegio Arubano. E team cu e mihor reportahe di e tarea ta bai Hulanda pa participa na e final di e olympiada. Actualmente e delegacion ta na Hulanda pa probecha pa orienta tambe riba nan futuro estudio. Na mei proximo un delegacion di cuater alumno di VWO 5 consistiendo di Liesje Proveyer, Dylan Schults, Claudia Sweerts y Julliana Lopez, bou guia di mr. Quant lo biaha pa Singapore pa representa Colegio Arubano na e Singapore Math Challenge 2016.

CON PA SIGUI PARTICIPACION

Por sigui e participacion di e alumnonan di Colegio Arubano na e Wiskunde A-lympiade y Singapore Math Challenge 2016 via e pagina di Facebook: Colegio Arubano. Por haña mas informacion tambe riba e website di Colegio Arubano:  www.colegioarubano.aw