Beursalen pa Hulanda tabata prome victima di un presupuesto no firma

ORANJESTAD –  Un total di 250 'beursalen' pa Hulanda tabata prome victima di un presupuesto no firma. Esey ta e motibo principal pakico placa a wordo deposita laat riba cuenta di e studiantenan. Placa a wordo deposita dialuna mainta riba cuenta di tur studiante cu ta biahando pa Hulanda diamars awo. Esaki a keda confirma pa minister di enseñansa Michelle Hooyboer dialuna merdia. E mandatario a acepta cu e problema di tardansa tabata tardansa den firmamento di e presupuesto. Ora cu NoticiaCla a puntra e mandatario kico di berdad tin cu e motibo inicial duna, esta cu lo pone placa despues cu e studiantenan biaha, pa evita cu nan ta gasta e placa, e minister a desmenti. “Mi no sa nada di esey. Esey ta puro rumor” Hooyboer a sigura NoticiaCla. E mandatario a splica cu den situacion normal, cu un presupuesto firma na tempo, e proceso lo a cana normal y no mester a haci tramite pa por a sera placa di otro forma. Ta netamente door cu e presupuesto no ta firma, tur cos a bruha. Y pesey, e no ta na altura exacto con esaki a bay. 

Berdad cu e contract tabata bisa cu mester a paga prome cu e studiantenan biaha, pero esey lamentable no por a tuma lugar. Berdad segun e minister tambe, ta cu normalmente e placa ta wordo deposita un siman prome. Algo cu awor tampoco no a tuma lugar. “Mi a wordo notifica awe mainta door di directie financien cu e placa ta riba cuenta di tur studiante (cu ta biahando pa Hulanda). Di unda e placa a bin, mi no sa” Hooyboer a bisa NoticiaCla. Loke si e la gradici, ta cu bon cooperacion entre departamentonan a pone cu a logra toch pa pone placa hunto pa por a deposita placa riba e cuenta di e studiantenan. E mandatario a bisa cu mientras cu ta berdad cu e placa ta destina pa e studiantenan na Hulanda, no tin problema cu e studiante por usa parti di e placa pa cumpra material aki na Aruba mes, manera un laptop of ipad.