Den pito Sv Britannia Total Finance ta gana La Fama 3-2

ORANJESTAD - Diahuebs anochi den Compleho deportivo Guillermo P. Trinidad na Dakota tabata tin continuacion di campeonato di A.V.B. / Subway ora cu e pumanan di Piedra Plat esta Sv Britannia Total Finance a enfrenta La Fama di Savaneta. Sv Britannia Pizza Hut ta bin di un victoria preta di 1-0 ariba Nac/Wash y di otro banda La Fama ta bin di un derota doloroso di 1-0 contra di Caravel. Sv Britannia Vitamalt/Gatorade ta ocupando e di dos lugar mientras cu La Fama ta na di 7 lugar ariba e tabla di posicion net tras di RCA. Sv Britannia Frisian Flag a cuminsa cu e siguiente aliñacion; Adrian Donayre den gol, Theric Ruiz, Miguel Gutierrez, Carl Geerman y Derwin Donato den defensa, Carlos Caro, Johnatan Ruiz y Jean Marc Farro den medio campo y Margin Kock, Pheadric Baromeo y Sebastian Montoya den delantero. Sv Britannia Bright Bakery cu ya ta clasifica tabata falta di varios hungador pa motibo di acumalacion di carchi, lecion, traha of malo manera; Luis Murillo, Benedicto v/d Biezen, Lus Estrada, Dannis Mozo, Cristian Navarro, Pierre Estiverne, Jean Claude Farro, Kenny Dania, Lionel Kaarsbaan, Marvin Hous, Randy v/d Heuvel y Renier Paraez. E wega mes a cuminsa unda nos por a observa cu La Fama a bin cu e idea pa busca 3 punto pa busca tur manera pa sali for di e zona peligroso pa no bai hunga promocion degradacion. E prome tempo e wega tabata bastante bruha y bou di nivel y cu hopi pasonan malo. Faltanto 1 minuut pa halftime Sebastian Montoya ta score pa su team depues di a ricibi un paso perfecto di Carlo Caro y asina halftime ta bay aden cu un ventaha chikito pa Sv Britannia Sports4All 1-0. Den di dos tempo La Fama a bin mas dicidi y a cuminsa pone presion ariba e defensa di Sv Britannia Bright Bakery encabesa pa Theric Ruiz y Derwin Donato y no a tarda mucho cu La Fama ta empata e wega y despues di un rato La Fama ta anota e gol di bay ariba 2-1 pa medio di Sylvester Swengle cu un tiro di distancia. Ora cu tur cos tabata mustra cu La Fama lo a bay cu e victoria y muchanan di Piedra Plat ta reaciona y ta anota pa medio di Theric Ruiz pa empata e wega na 2 gol pa banda y den pito ta John Lugay cu ta anota e gol di victoria pa Sv Britannia Total Finance. Cu e victoria aki tambe Sv Britannia ta sigui acumula punto apesar di a clasifica caba, pero La Fama ta keda den un zona no mucho confortabel. E tabla di posicion ta como lo siguiente; RCA, Sv Britannia, Dakota, Nac/Wash, Bubali, Riverplate, La Fama, Estrella, Caravel y FC San Nicolas. Despues den camarin e muchanan di Britannia a canta Happy Birthday pa Jean-Carl Henriquez cu a cumpli 17 aña y tabata pa prome biaha Jean-Carl tabata den e 18 hungadornan den divicion Honor. Un pabien ta bay pa e Pumanan di Piedra Plat y na staff tecnico.