Hulanda no ta contento cu declaracion di Bermudez

DEN HAAG - “E candidatura di minister Bermudez (pa funcion di Gobernador di Aruba) no ta na ordo”. Asina Ministerio di Relacionan Interior di Hulanda a reacciona awe mainta riba e noticia di NoticiaCla.com riba e noticia di confirmacion di propio minister Bermudez pa e funcion. NoticiaCla.com a confirma cu gobierno Hulandes no a gusta e hecho cu e mandatario di finanza a expresa su mes riba e tema di candidatura pa Gobernador. 

NO TIN UN ACUERDO

“E nominacion na Conseho di Minister di Reino pa un nombracion di un Gobernador nobo pa Aruba ta un responsabilidad comun di Aruba y Hulanda” e ministerio a sigui bisa. “No tin un acuerdo riba un nominacion di ambos pais, y e candidatura di minister Bermudez, pa loke ta Hulanda, no ta alcaso aworaki” e comunicado ta finalisa bisando. 

HULANDA NO TA CONTENTO

Cu esaki Hulanda kier bisa cu mientras cu Aruba tin su candidato, -cu a keda confirma pa propio minister Bermudez na NoticiaCla.com diasabra mainta- , esey no kiermen cu tin un acuerdo entre e dos gobiernonan riba e posicion aki. Pues, NoticiaCla.com por a confirma cu Hulanda no a keda nada contento cu e declaracion haci pa Bermudez. 

CONFIRMACION PA BERMUDEZ ANTERIORMENTE

Si Conseho di Minister di Reino acepta su candidatura, actual minister di finanza Angel Bermudez ta bira e proximo gobernador di pais Aruba. Tabata awe mainta cu NoticiaCla.com a raporta e informacion aki den un forma di confirmacion di e noticia cu tabata circula algun dia caba. Tabata awe mainta cu e mandatario (cu actualmente ta cu un viahe di trabou na Merca) a confirma na NoticiaCla.com cu enberdad el a keda aserca pa e funcion di Gobernador di Aruba, y tambe cu el a acepta e funcion. E mandatario a contesta ‘si’ riba ambos pregunta. E unico condicion cu e mandatario a pone, ta cu e tin cu caba cu e presupuesto 2017 y entrega esey. Unabes cu esey ta cla, e mandatario ta cla pa asumi e funcion di Gobernador di Aruba. 

MISION FINANCIERO

E mandatario actualmente ta na Merca riba un mision pa busca placa riba mercado internacional pa cancela prestamonan pendiente di pais Aruba pa 2016. Diabierna el a haya confirmacion cu Conseho di Minister a aproba su autoridad a base di articulo 29 di Statuut pa subi mercado internacional pa fia placa. “E siman aki nos a bishita aproximadamente 25 institucion financiero pa evalua e mercado y check inversionista” e mandatario a bisa NoticiaCla.com. E intencion ta pa busca un prestamo di maximo 100 miyon dollar pa refinancia prestamonan cu ta vence e aña aki.

LISTA DI CANDIDATO

Manera cu NoticiaCla.com a raporta algun siman atras den forma di primicia, tabatin un lista di candidato cu tabata circula pa e funcion di Gobernador di Aruba. E lista tabata figura varios persona for di politico pa no-politico. Na januari ultimo prome minister Eman a sigura cu pa februari e lista lo mester tabata cla. Fin di februari Eman a sigura e portal aki cu enberdad gobierno tin su candidato, cu e no ta un politico y cu e persona a keda aserca y cu e persona a acepta e reto tambe. E intencion tabata pa cana e proceso awor pa haya un ‘draagvlak’ amplio prome cu presenta e candidato na gobierno di Reino. 

DURA PROME CU DRENTA DEN FUNCION

Ademas Eman a anticipa cu e lo por dura un poco mas largo cu luna di mei (ora cu e termino final di e actual Gobernador vence), y cu lo aserca e actual Gobernador pa wak si e ta dispuesto pa sinta un poco mas largo te ora cu e proceso keda cla. Si e no ta dispuesto, lo tin cu laga e Gobernador interino asumi e funcion temporalmente. Awor ta conoci cu e periodo ey por dura te por lo menos september, ora cu e presupuesto 2017 mester ta entrega. Den pasado ta conoci cu casi nunca e presupuesto a keda entrega na tempo, pero mirando cu tin un ley Laft cu (fuera di e ley di compatbilidad cu ta stipula entrega di e presupuesto di e aña anterior keda entrega 1 september di e aña anterior,) ta forza gobierno tene su mes na esey, e aña aki si por spera cu e presupuesto lo por keda entrega na tempo. 

REEMPLAZANTE PA BERMUDEZ

Un otro punto ta e ora, ken ta bira e proximo minister di finanza, y si ta bay busca un otro of ta keda cu e cantidad di minister y ta simplemente duna un minister actual e ‘extra cartera’ mirando cu ta trata di ‘apenas’ un aña mas prome cu tin eleccion. Aunke cu NoticiaCla.com no por a confirma, tin papia cu minister Mike de Meza lo por ta e persona cu ta haya e funcion aki bek, temporalmente.