Arubaanse Muziekschool Y SMRW a distancia nan mes di declaracion di Johnny Croes

ORANJESTAD - Directiva di Arubaanse Muziekschool (AMS) y Scol di Musica Rufo Wever (SMRW) no ta para tras di e comentarionan di sr. Johnny Croes relaciona cu su comentarionan riba social media recientemente tocante musiconan y cantantenan cu a particpa na un proyecto na New York - Merca, ‘sea cual sea su motibo’. Croes lo a reacciona den un forma negativo contra e idea di e proyecto, y despues lo a pidi despensa pa e expresionan haci. E reaccion di Croes no a cay den bon tera cerca e directiva y como tal a reacciona di tal forma pa ‘set the record straight’. 

TA DISTANCIA DI COMENTARIONAN DI CROES

Den un reaccion na NoticiaCla.com diabierna merdia, presidente di AMS y SMRW, Goswin Oduber a splica cu nan kier a haci uzo di e oportunidad aki di informa na un y tur, y sigur esnan di un manera of otro por a sinti nan molestia y hasta kisas ofendi, cu nos ta distancia nos mes di comentarionan imprudente cu un docente di nos scol, esta sr. Johnny Croes, a expresa riba un media social tocante musiconan y cantantenan cu a particpa na un proyecto na New York - Merca, sea cual sea su motibo. 

META DI AMS YSMRW

Segun Oduber, Stichting Arubaanse Muziekschool tin como meta pa, en general, promove musica y tur otro arte cu tin algo directamente di haber cu ne, y en particular pa duna enseñansa den e artenan aki.“ AMS/SMRW ta un scol publico cu ta duna respet y apoyo na coleganan musico di bon boluntad, sin importa nan nivel, interes y/of escogencia. E tarea principal di AMS/SMRW y su docentenan ta pa duna educacion na hoben y adulto riba tereno di musica na Aruba, cu e meta cu algun dia nos weita nos musiconan yega nivelnan halto unda e.o. nan lo por participa den proyectonan manera esun di New York y ohala miles di otro” Oduber a sigui bisa. “ Cu e comunicado aki AMS/SMRW kier duna di conoce na e musiconan, cantantenan y e organisacion total di e proyecto ariba menciona cu nos no ta para tras di e comentarionan di sr. Croes. AMS/SMRW ta boga pa un bon relacion entre musiconan y tur hende cu kier haci algo positivo pa e arte di musica y otronan” Oduber a sigui bisa, y a firma e comunicado ‘Na nomber di directiva di Stichting Arubaanse Muziekschool, director y coleganan’. Lesa e comunicado completo aki. 

Foto ta cortesia di Poets Show