ATA: Eliminacion visa pa Peruano ta crea mas potencial pa e mercado aki

ORANJESTAD - Oficina di turismo ta considera e eliminacion di visa pa Peruano entrante 14 di maart awor, algo ‘hopi positivo’. Asina e CEO di e oficina di turismo di Aruba Ronella Tjin Asjoe a bisa NoticiaCla.com diabierna mainta. Segun Tjin Asjoe, ‘nos ta mira potencial den e mercado di Peru’. De hecho, e CEO ta splica cu ta for di aña pasa nan ta trahando pa engrandece e mercado. E intencion, prome cu eliminacion di e visa, tabata pa aumenta e cantidad di turista for di Peru cu 50%. “Lo revisa e meta aki awor y subi’e”, Tjin Asjoe a sigui bisa. 

E MERCADO PERUANO

E mercado Peruano di turismo no ta grandi, pero tin potencial. Den 2015, Aruba a registra e cantidad di 1634 turista Peruano. Mientras cu esaki no ta parce hopi, Tjin Asjoe ta sigura cu e ta un aumenta si di 30% compara cu 2014. Y manera indica caba, prome cu a bin cu e eliminacion di e visa, e intencion tabata pa aumenta e cifra aki te na 2500 pa 2016. Pero esey obviamente tin potencial pa crece mas ainda y como tal e oficina ta haciendo su maximo pa revisa e cifra cu nan kier logra pa 2016. “Nos a combersa cu varios aeroliña caba pa atende e mercado aki”.  Pa e CEO di Aruba Tourism Authority, ‘eliminacion di e visa ta ofrece mas potencial pa e mercado aki”.