Entrante 14 di maart ta elimina visa pa Peruanonan drenta Aruba

ORANJESTAD - Despues cu a kita visa pa Colombia, e proximo pais cu no mester di visa mas pa drenta Aruba ta bira Peru. Esaki ta drenta na vigor entrante 14 di maart proximo. Esey ta nifica cu entrante e fecha ey, no ta necesario mas pa Peruanonan tin visa pa nan por drenta nos isla. E ta crea un oportunidad mas grandi awor pa Aruba por fomenta turismo for di e pais ey tambe, y mes momento haci  mas facil pa e algo mas di mil Peruanonan residencia na Aruba, unifica cu nan famia pa medio di bishita mas frecuente for y di Peru. Mescos cu ta trata e caso di Colombia, a bay un preparacion rigoroso pa tur departamento necesario por atende e fluho di persona extra. Segun informacion haña di Registro Civil y Censo NoticiaCla.com a cu actualmente tin registra 1403 persona naci na Peru biba na Aruba.  

ANUNCIO NA 2015

Na augustus di 2015 na Peru, Natalie Vendalino, representante pa Chile y Peru di oficina di Turismo di Aruba, a informa cu ora cu elimina e visa Schengen, cu lo elimina automaticamente e rekisito di visa pa Peruano. Esey tabata durante un encuentro na Sonesta na Peru mes. A recorda e tempo ey tambe cu e momento ey ainda, peruanonan cu tabatin visa Schengen, of visa pa Merca, no tabatin mester di visa pa drenta Aruba. Algo cu a conta pa esnan di Colombia tambe. Si nan no tabatin esey, mester a procesa nan visa regular via embahada di Hulanda na Peru. E tempo ey tabata premira cu pa fin di 2015 of prome cuartal di 2016 lo a elimina e visa. Y awor tin un fecha ofiical pa esey tuma lugar, esta dia 14 di maart proximo.  

ELIMINACION VISA COLOMBIANO

Tabata 3 di december na 2015 cu a kita visa pa Colombianonan drenta Aruba.  Tur Colombiano cu kier a drenta Aruba, por a haci esaki sin cu nan mester di un visa. Pa esey tuma lugar, a nifica un preparacion grandi cu ne, unda cu tur departamento encarga, mester tabata cla pa por ricibi e fluho di pasahero aki cu ta yega awor, y cu por wordo procesa sin cu mester tin visa. Obviamente esaki ta nifica un fluho mas grandi di pasahero cu lo cuminsa yega Aruba entrante awe. Con hopi e diferencia ta, ta dificil pa bisa ainda.

ELIMINA VISA TA NIFICA BOOM DI TURISMO

E tempo ey, a combersa cu e directora di turismo di Aruba Ronella Tjin Asjoe, cu a mustra cu e eliminacion di e visanan ta bon pa turismo di Aruba. “Nos sa, cu eliminando e rekisito aki, nos lo experencia un boom di turismo for di Colombia y e ta un gusto comparti esaki un biaha mas cu boso,” Ronella Tjin Asjoe-Croes a conclui bisando durante e evento cu a wordo concuri pa 150 socio y medionan di prensa y unda a reina un entusiasmo grandi. No por a localisa Tjin Asjoe awe ainda pa su reaccion riba e eliminacion di visa pa Peru.