Casinonan na Aruba preocupa cu e ley di ‘no huma’ lo perhudica e industria

ORANJESTAD - E sector hotelero (principalmente sector di casino)  ta preocupa cu e proposicion di ley riba prohibicion di humamento cu parlamento kier introduci. Mas concreto, AHATA ta premira problema pa e parti di restaurant, mirando cu unabes e ley pasa, tin cu introduci esaki na tur restaurant mesora. Contrario na casino cu ta haya 2 aña pa implementa e cambio di ley aki. Den un reunion entre e asociacion di casino y e comision financiero permanente di parlamento e siman aki, a discuti e ley atrobe. Un ley cu ta wordo lidera pa parlamentario Marlon Sneek y cu ta data for di 2013. 

CARTA AHATA

Den un carta di AHATA pa su miembronan, e presidente Jim Hepple ta mustra cu enberdad e asociacion tabata na altura di e ley for di reunionan na 2013 y 2014, pero nunca no a haya un copia di e proposicion. Ora cu nan a pidi e copia e siman aki, a resulta cu e proposicion a keda manera cu nan a wak e na 2014, esta cu no tabatin ningun cambio sugeri, implementa. Pa completa e obra, nan a bin compronde cu e siman aki caba, diabierna proximo 11 di maart, parlamento lo a trata e ley aki. E ora AHATA a pidi presidente di parlamento pa pospone esaki pa duna chens na miembronan di AHATA pa revisa y bin cu comentario riba e ley. E presidente a bay di acuerdo, y awor lo trata e ley dia 7 di april proximo. 

PROBLEMA CU E LEY

NoticiaCla.com a compronde cu e asociacion di casino tin problema cu e ley, mirando cu un prohibicion general di huma den e edificio di e casino, lo nifica un perdida grandi pa casinonan individual, pero tambe pa e reputacion di Aruba. Tur esaki segun e asociacion. Algo cu nan a informa parlamento tambe den un carta fecha 4 di februari 2014. Esaki sinembargo no a wordo incorpora den e concepto di ley. 

COMPRENSION PA CASINO 

Parlamento na su turno, e tempo ey a mustra cu mientras cu nan ta compronde e punto di e casinonan, e interes di salud pa cu e trahadonan ta mas importante. “E interes ey ta e punto di salida”, parlamento a bisa e tempo ey. “Si casinonan kier continua pa haci posibel pa (clientenan) por hunga y huma na e mesun tempo, nan (casino) mester tuma medida cu hungamento den casino y humamento por tuma lugar den un lugar separa, cera unda cu ningun trahado lo mester ‘duna servicio’, manera waiter of algo por el estilo. Ademas mester percura pa aparatonan sofistica cu mester por ‘deshaci’ di e huma di sigaria. 

EXCEPCION PA CASINO

A mustra cu solamente casinonan, si nan kier, mester tuma e medidanan mas drastico pa cumpli cu e provision den e ley. Como tal nan lo haya tempo pa haci esaki y e periodo pa esaki ta 2 aña. Esey ta nifica cu unabes cu e ley pasa, e ta obligatorio pa e industria turistico cu excepcion di casino. “Pero no por warda eternamente y como tal a stipula un periodo di 2 aña pa casinonan cumpli’. 

AHATA SU OBHECION

NoticiaCla.com a compronde cu AHATA tin problema cu e provision ey mirando cu unabes cu e ley pasa, e ta drenta na vigor e mainta despues cu parlamento pasa e ley, mientras cu casinonan ta haya 2 aña cu ta cuminsa tambe mesun mainta despues cu pasa e ley, y e periodo di ‘gracia’ ta vence 24 luna despues cu parlamento pasa e ley.