Fayo den sistema na WEB a causa 'brown out' na Aruba

BALASHI - Un fayo na WEB Aruba NV a causa cu hopi parti di Aruba ta sin coriente. Como cu no ta trata di Aruba completo, WEB no ta considera esaki como un 'blackout' sino un brown out, cu ta nifica cu varios parti (vs full Aruba) no tin coriente. "Na momento aki (techniconan di WEB) ta trahando duro pa stabilisa e produccion di coriente" vocero di e compania di utilidad Asja Dongen a confirma na NoticiaCla.com diahuebs marduga. "Ta dificil pa determina con largo e ta bay dura" Dongen a sigui bisa. No ta conoci kico e causa exacto ta tampoco. "Esaki mester wordo determina ainda pero awor ta concentrando riba stabilisacion (di e coriente)" Dongen a finalisa bisando. 

VARIOS PARTI SIN CORIENTE

E problema ta na varios caminda di Aruba  unda cu for di Westpunt te Playa y Savaneta ta raportando problema. Mientrastanto areanan manera Paradera y Boegoeroei si tin coriente. Algun area ta raportando cu for di 2:45 am caba nan no tin coriente. 

KICO TA UN BROWN OUT

E tema 'brown out' no ta hopi conoci pa hopi hende. E nificacion oficial di un 'brown out' ta nifica 'un reduccion den un, of restriccion di e disponibilidad di coriente den un area particular'