SVB a resolve tur discrepancia pa pagonan di pensioen AOV y AWW

ORANJESTAD - SVB dialuna a anuncia cu nan a resolve tur discrepancia pa pagonan di pensioen AOV y AWW y cu entrante luna di september 2014 e departamento di Pensioen ta cuminsa paga e pensioen di AOV y AWW riba dia 1, esta e prome dia di cada luna. E espacio di esaki a ser crea despues di a introduci e sistema nobo na Pensioen, e asina yama sistema PRAS (Pensioen Registratie & Administratie Systeem).

Cu introduccion di e sistema aki 1 aña pasa SVb a finalisa e proceso di automatisa y digitalisa e proceso di pensioen di AOV y AWW. “Awor cu tur e discrepancia nan cual un sistema nobo ta bin cun’e a ser resolvi, SVb ta uza e espacio liber aki pa brinda un mihor servicio na su clientenan. Mirando cu e cantidad di pensionadonan a crece y ta sigui crece segun proyeccion nan pa e proximo añanan, SVb ta sigui inverti y asina por sigui brinda tur pensionado un nivel halto di servicio di parti di SVb. Ta bon pa tuma nota cu den caso cu dia 1 ta cay riba un diasabra, diadomingo of un dia di fiesta, SVb ta paga e pensioen riba e proximo dia di trabao riba cual banconan ta habri. Bao ningun circumstancia SVb ta paga un pensioen prome cu dia 1 di e luna ariba cual e pensioen tin referencia.