Seis bapor crucero a dorna waf di Aruba awe

ORANJESTAD - Manera pronostica, e waf di Aruba tabata yena cu bapornan crucero, cu for di mainta tempran a cuminsa mara y dorna nos waf pa gran parti di dia. For di mainta 6'or e prome bapornan a cuminsa yega, y esey a sigui gran parti di dia. Constantemente por a nota presencia di 5 bapor continuo, unda cu merdia un rato, tabatin 'cambio' di puesto ora cu uno a bandona Aruba y mesora  a keda reemplasa cu otro. Ainda no ta conoci cuanto turista exacto a yega Aruba, pero tabata bisto con congestiona centro di ciudad tabata, no solamente cu hende sino cu auto. Tanto den centro como pafo, autonan tabata den filanan largo. Esnan cu a kere cu nan lo a haci 'cos sabi' di sali pafo di ciudad, a haya nan mes confronta cu miles di hende cu a pensa mescos. 

Tiendanan tabata repleto, y por a nota e trafico di hende riba pia constantemente. Den careda di 4'or di atardi, e prome bapornan a cuminsa bandona Aruba y asina lo sigui te awe nochi 11'or ora cu e ultimo lo bandona nos isla. Sigur un bunitesa laga atras na bista y probablemente tambe comercialmente.  Foto ta di NoticiaCla.com su drone.