Polis buscando alivio pa famia bibando sin awa y coriente den Madiki

ORANJESTAD - Cuerpo Policial e siman aki a ricibi un melding tocante di un situacion menos bon di un famia cu ta bibando cu tres yiu menor di edad den un condicion deplorabel, unda cu no tin ni coriente ni awa. Inmediatamente a bishita e cas situa na Madiki y a bin constata cu e situacion cu nan ta bibando aden mester di yudansa di diferente instancia. 

SANGURA TA BROEI DEN POS

Hunto cu Slachtofferhulp a envolve GKMB pa deshaci di sanguranan cu a broei den un pos cu ta kibra y Higienische Dienst pa inspecta e cas pa cu e situacion di higiena.

MESTER DI DONACION PA YUDA FAMIA

Vocero di Cuerpo Policial, Lito Lacle, kende ta entre e prome personanan cu a yega na e cas, ta haci un apelacion riba comunidad di Aruba pa yuda e muchanan di e famia aki cu paña y si ta posibel otro donacionnan cu por yuda mehora nan situacion. Ta trata di tres hoben, un mucha homber di 10 aña y dos mucha muhe di 7 y 9 aña, cu tur dia tin cu prepara pa bay scol bou circunstancianan cu no ta apto. 

NO TIN AWA NI CORIENTE

Donacionnan por wordo entrega na nomber di agentenan Vos y Nicolas na Warda di Polis di Oranjestad. E muchanan ta biba cu nan mayornan den e cas cu no tin ni awa ni coriente. Patrick Lacle a agrega cu nan ta acercando Directie Sociale Zaken pa logra re aloca e famia. Di parti di GKMB a laga sa cu e sanguranan cu a haya na e cas no ta Aedes Aegypti, cual ta transmiti Dengue, Chikungunya y Zika, pero ta e sangura cu ta broei den pos. Pa loke ta trata e posibel criaderonan cu a haya na e cas, esakinan lo mester wordo elimina pa sigura cu no tin oportunidad pa Aedes Aegypti broei. Cuerpo Policial ta haciendo tur loke ta posibel pa yuda e famia aki pa yega na un miho situacion pa e tres hobennan pa kende awo e situacion deplorabel ta haci dificil pa nan por prepara pa scol y studia cu trankilidad den un ambiente cu nan mester y merece.